Дана Уайт Ислом Махачевнинг навбатдаги рақиби ким бўлиши ҳақида гапирди

Жорий йилнинг 27 февраль куни Лас-Вегасда (АҚШ) ўтказилган UFC Fight Night 202 турнирининг марказий жанггида россиялик Ислом Махачев америкалик Бобби Гринни техник нокаут эвазига мағлуб этди. Бу Исломнинг UFC’даги кетма-кет 10-ғалабаси эди. Ҳозирда доғистонлик спортчининг кейинги жангги чемпионлик камари учун кечиши кераклиги ҳақида гап сўзлар урчиди. 

UFC президенти Дана Уайтга кўра, Исломнинг навбатдаги баҳси Бенеил Дариушга қарши бўлиши мумкин. Бенеил UFC’нинг енгил вазн тоифасидаги рейтингги баланд спортчилардан бири ҳисобланади ва у Махачевга муаммо туғдиришни эплай олади.

“Бу йигит (Ислом Махачев) ниҳоятда зўр. Бобби Грин ушбу жангга 10 кун қолганда рози бўлган. Бироқ у ажойиб тайёргарликка эга эди. Махачевга қарши октагонга чиқишидан бироз олдинги жангда чиройли ғалаба қайд этганди. Махачевнинг Боббига ўхшаган йигитга қилган иши эса дахшатнинг ўзгинасидир. Бу Бобби учун жуда оғир эди. Махачевнинг чемпионлик жанги муҳокама қилинмоқда. Лекин барибир Исломнинг Дариуш билан жангини кўришни истайман. Бенеил Дариуш UFC енгил вазн рейтинггининг учинчи рақамли жангчиси ҳисобланади. Дариуш Ислом билан бўладиган жангга бир ҳафта қолганида оёғини синдириб олди. Бу – спорт, унда нималар бўлмайди дейсиз. Ислом Махачевнинг кейинги рақиби ким бўлишини муҳокама қиламиз”, деган Уайт.

Маълумот ўрнида, россиялик жангчи Ислом Махачев 27 февраль куни америкалик Бенеил Дариуш билан жанг қилиши керак эди. Бироқ жангга оз фурсат қолганида Бениелнинг октагонга чиқолмаслиги маълум бўлди. Айни дамда UFC’нинг енгил вазн тоифасида чемпион бразилиялик Чарльз Оливейра ҳисобланади. Чарльздаги камарга асосий даъвогар сифатида Махачев эътироф этилмоқда.

Маъруф Абдумаликов