“Collins” луғати йил сўзини эълон қилди

Буюк Британияда нашр қилинадиган “Collins” инглиз тили луғати 2025 йилнинг йил сўзи сифатида “vibe coding” атамасини эълон қилди. Бу ҳақда луғатнинг расмий сайтида хабар берилди.

Луғат изоҳига кўра, “vibe coding” – бу вазифани оддий инсон тилида тасвирлаб бериш орқали, сунъий интеллект ёрдамида компьютер кодини ёзиш жараёни. Яъни, одам кодни ўзи ёзмайди, балки сунъий интеллектга қандай натижа кераклигини айтади ва сунъий интеллект кодни тайёрлаб беради.

Қайд этилишича, бу сўз ҳозир нафақат Кремний водийсида, балки дунёнинг кўплаб жойларида кенг қўлланилмоқда. Бу эса сунъий интеллектнинг кундалик ҳаётга кириб келаётгани ва маданий ўзгаришларнинг ортаётганини кўрсатади.

Шу билан бирга, бундан олдин “Лабубу” ва “слоняра” атамалари ҳам 2025 йилнинг энг машҳур 40 та сўзи қаторига киргани айтилган.

Эслатиб ўтамиз, аввалроқ Оксфорд луғати “brainrot” сўзини 2024 йилнинг энг машҳур ва энг яхши сўзи деб эълон қилган эди. Ушбу сўз 37 минг ўқувчи орасидан овоз бериш йўли билан танланган. “Brainrot” – бу сифатсиз онлайн контентни ҳаддан ташқари истеъмол қилиш оқибатида инсоннинг руҳий ёки интеллектуал ҳолатининг ёмонлашишига ишора қилади.

Моҳичеҳра Қадамова