Чилонзорда эркак кўчада кетаётган қизга шаҳвоний шилқимлик қилди

Тошкент шаҳрида кўчада дугоналари билан кетаётган қизга шаҳвоний шилқимлик қилган 36 ёшли эркак Р.Қ. 5 суткага қамалди. QALAMPIR.UZ суд ҳужжати билан танишди.

Ҳужжатда келтирилишича, 1988 йилда туғилган эркак жорий йилнинг 9 май куни тахминан соат 20:10 ларда Чилонзор метро бекати олдида М.И. нинг олд белдан паст жинсий аъзосига тегиниб, унга нисбатан номақбул бўлган ҳамда унинг шаъни ва қадр-қимматини таҳқирлайдиган шаҳвоний хусусиятга эга бўлган ҳаракатларни содир қилган.

Кеча, 19 май куни Жиноят ишлари бўйича Чилонзор туман судида мазкур иш кўриб чиқилган. Суд мажлисида Р.Қ. айбига қисман иқрорлигини билдирган. Унинг айтишича, ўша куни у кафеда спиртли ичимлик истеъмол қилиб, Чилонзор метроси томонга кетаётганида М.И. га туртилиб кетган. Р.Қ. содир этган қилмишидан пушаймонлигини, бундан кейин бу ҳолатлар бошқа такрорланмаслигини билдириб, суддан ўзига нисбатан енгиллик беришни сўраган.

Суд мажлисида жабрланувчи М.И. ҳолатни тўлиқ тасдиқлаб, у дугоналари билан Чилонзор метроси томондан келаётган вақтида Р.Қ. унинг олд белдан паст жинсий аъзосига тегинганлиги, шундан кейин 102 рақамига хабар берганлигини билдириб, Р.Қ. га қонуний чора кўришни сўраган.

Судланувчи Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисмида назарда тутилган маъмурий ҳуқуқбузарликни содир қилган деб топилган ва унга нисбатан 5 сутка маъмурий қамоқ жазоси тайинланган.

Эслатиб ўтамиз, аввалроқ Тошкент шаҳрида жойлашган Алишер Навоий номидаги университетда талаба йигит ўз курсдошига шаҳвоний шилқимлик қилган эди.