ChatGPT’га ишонган мураббий ишидан айрилди

Россиянинг “Сочи” футбол клуби собиқ бош мураббийи, испаниялик Роберт Морено жамоа билан ишлаш жараёнида ChatGPT хизматидан фойдалангани маълум бўлди. Бу ҳақда клубнинг собиқ бош директор ўринбосари Андрей Орлов “Sports.ru” нашрига маълум қилди.

“Қизиқ бир ҳолатни айтиб ўтаман. Хабаровскка сафар олдидан тайёргарлик кўраётганимизда Роберт: “Ҳамма нарсани ўйлаб қўйдим, сафарнинг барча параметрларини ChatGPT орқали ҳисоблаб чиқдим”, деди. Охир-оқибат, биз айнан ChatGPT тузган жадвал асосида иш тутдик”,  деди Орлов.

Унинг сўзларига кўра, нейрон тармоқ мураббийга “Сочи” футболчилари SKA–Хабаровскка қарши ўйин олдидан 28 соат ухламасликлари ва эрталаб соат 05:00 да уйғонишлари кераклигини тавсия қилган.

Шунингдек, Орловнинг таъкидлашича, испаниялик мутахассис ChatGPT’дан жамоага янги футболчиларни топишда фойдаланган. Янги ҳужумчи излаётган Морено Владимир Писарский, Павел Мелёшин ва Артур Шушеначев профилларини нейрон тармоққа юклаган.

ChatGPT энг яхши вариант сифатида Шушеначевни танлаган. Бироқ, у 2024-2025 йилги мавсумда “Сочи” сафида ўтказган 10 та учрашувда бирорта ҳам гол ура олмаган.

Маълумот учун, Роберт Морено 2023 йилда “Сочи” бош мураббийи этиб тайинланган. Унинг қўл остида жамоа Россия Премьер-лигасидан Биринчи лигага тушиб кетган, бир мавсумдан сўнг эса элитага қайтган.

Бироқ , 2025 йил сентябрь ойида “Сочи” РПЛдаги 7 та ўйинда атиги 1 очко жамғарганидан кейин клуб раҳбарияти Моренони истеъфога чиқарганини эълон қилди. Унинг ўрнини Игорь Осинкин эгаллади.

Жорий мавсумда 18 турдан сўнг “Сочи” жамоаси 9 очко билан Россия Премьер-лигаси турнир жадвалида 16-ўрин, яъни сўнгги поғонада бормоқда.