Buxoroda yana bir uyda gaz portladi. Qurbon bor

Buxoro viloyatining G‘ijduvon tumanidagi uyda gaz chaqnashi oqibatida 1 kishi halok bo‘ldi. Bu haqda QALAMPIR.UZ so‘roviga javoban viloyat Favqulodda vaziyatlar boshqarmasi ma’lum qildi.

Bildirilishicha, joriy yilning 5 fevral kuni soat 18:20 larda viloyat IIB navbatchilik qismidan olingan xabarga ko‘ra, G‘ijduvon tumani “Armechan” MFYda yashovchi fuqaroning uyida chaqnash sodir bo‘lib, 1 kishi vafot etgan.

Surishtiruv harakatlari davomida fuqaroning yashash uyida o‘rnatilgan isitish pechidan gaz sizib chiqishi oqibatida xonada havo-gaz aralashmasi yig‘ilgani aniqlangan. Xonadon egalari yoritish chirog‘ini yoqqan paytda havo-gaz aralashmasi chaqnashi sodir bo‘lgan. Chaqnash oqibatida II guruh nogironi I. T. tan jarohati olib, hodisa joyida vafot etgan.

Bildirilishicha, olib borilgan o‘rganishlar davomida yong‘in sodir bo‘lmagan va yong‘in-qutqaruv ekipajlari jalb etilmagan.  Voqea joyiga viloyat FVB rahbariyati, tuman IIB va IIB TTG a’zolari chiqqan.

Eslatib o‘tamiz, avvalroq ham Buxoro viloyati G‘ijduvon tumanidagi xonadonlardan birida gaz chaqnagani xabar qilingandi. Hodisa oqibatida yong‘in yuzaga kelmagan, jabrlanganlar va halok bo‘lganlar yo‘q. Voqea joyiga viloyat FVB va G‘ijduvon tuman IIB mas’ul rahbarlari hamda 2 ta yong‘in-qutqaruv ekipaji yetib borgan.