Бугун Президент тадбиркорлар билан учрашади

north_east

Ортиқхўжаевдан Ҳошимовгача. Президент бир гуруҳ тадбиркорларни мукофотлади

Бугун, 20 август куни Президент Шавкат Мирзиёев тадбиркорлар билан очиқ мулоқот ўтказади ва уларнинг бир гуруҳига давлат мукофотларини топширади. Бу ҳақда Президент матбуот котиби Шерзод Асадов маълум қилди. 

Маълумки, Президентнинг тадбиркорлар билан очиқ мулоқот шаклидаги илк учрашуви 2021 йил 20 августида ўтказилган эди. Ўша учрашувда давлат раҳбари бундай тадбирни ҳар йили ўтказиш ва 20 августни Тадбиркорлар куни деб эълон қилишни таклиф қилганди. Шундан буён учрашувлар анъанавий равишда ўтказиб келинмоқда, уларда тадбиркорларни ўйлантираётган масалалар муҳокама қилинмоқда ва улар билан маслаҳатлашган ҳолда қарорлар қабул қилинмоқда.

Шу кунгача очиқ мулоқотларда тадбиркорлар томонидан билдирилган 1 мингга яқин таклиф ва ташаббуслар қонун ва қарорларда ўз аксини топди. Бугунги очиқ мулоқотга тайёргарлик давомида 26 та соҳанинг 7 мингга яқин вакиллари билан учрашувлар ўтказилган. “Колл-марказ” орқали 13 мингдан зиёд мурожаат ва ташаббуслар келиб тушган.

Бугунги учрашувда давлат раҳбари ушбу мурожаатларни ўрганиш асосида ишлаб чиқилган ҳамда тадбиркорлик фаолиятига янада кўп қулайлик яратишга қаратилган янги ечимларни илгари суриши кутилмоқда.  

Шунингдек, Шавкат Мирзиёев Янги Тошкентда олиб борилаётган бунёдкорлик ишлари билан ҳам танишади.