Бритни Спирс қарийб 12 миллион долларлик уйини сотмоқчи

Америкалик қўшиқчи Бритни Спирс Калифорния штатининг Калабасас шаҳридаги янги уйини сотишга қарор қилди. У кўчмас мулкни сотиб олганидан бир неча ой ўтиб сотувга қўйди. Бу ҳақда TMZ хабар берди.

Спирс ва унинг эри Сэм Асгари уйни 2022 йил июнь ойида 11,8 миллион долларга сотиб олган. Объект минг квадрат метрдан ортиқ майдонни эгаллайди. Сотишнинг аниқ сабаби номаълум, бироқ хонандага яқин манбалар Спирсга уй ёқмаганини таъкидлади.

Қўшиқчи бошқа кўчмас мулк – Таузанд-Окс шаҳридаги уйга ҳам эгалик қилади. Бритни уни 2015 йилда 7,5 миллион долларга сотиб олган. Хонанда эски уйда қоладими ёки янги уй қидирадими, ҳозирча номаълум.

2022 йил сентябрь ойида Бритни Спирс Флорида штатининг Дестин шаҳридаги квартирасини икки миллион долларга сотган эди. У уни 2001 йилда 920 000 долларга сотиб олган.

Маълумот ўрнида, Бритни Спирс 1981 йил 2 декабрда АҚШнинг Миссисипи штатида дунёга келган. У поп-қўшиқчи сифатида 2000-йилларда катта машҳурликка эришган. Шунингдек, у актриса, раққоса, қўшиқ муаллифи сифатида ҳам фаолият юритган. Энг яхши рақс муаллифлиги учун “Gremmi” мукофоти совриндори бўлган.

Соҳиба Комиловна