“Бренд учун ортиқча тўловга чек қўямиз”. 7Tech ўзининг илк смартфонини намойиш этди

Сиз доим ортиқча пул тўлагансиз! Замонавий смартфон бозорида кўпчилик харидорлар билмасдан бир тузоққа тушишади: сиз сотиб олаётган кўпгина машҳур қурилмалар нархининг асосий қисми телефоннинг ўзига эмас, шунчаки унинг корпусидаги танилган бренд номи ёки логотипи учун тўланади. Аслида таннархи анча арзон бўлган телефонларга машҳурлик маркаси туфайли асоссиз равишда юқори устама нарх қўйилади.

Жорий йилнинг 20 август куни расмий сотувлари бошланган 7Tech Connect U7 смартфони эса бу адолатсизликка чек қўймоқда. Энди сиз ном учун ортиқча пул тўламайсиз — фақат маҳсулотнинг асл қиймати ва реал имкониятлари учун ҳақ тўлайсиз.

Спорт вакиллари, техноблогерлар ва яна юзлаб инсонларни бир манзилга Ўзбекистон технобозоридаги муҳим воқелик жамлади. 7Tech бренди ўз тарихидаги илк смартфон – Connect U7 моделини расман жамоатчиликка тақдим этди. Ёпиқ тақдимот маросими шу йилнинг 20 август куни бўлиб ўтди.

Connect U7 шунчаки ташқи кўриниши чиройли телефон эмас. Унинг ичига 8 GB тезкор хотира ва ультра тезкор 5G алоқа тизими жойланган. MediaTek Dimensity 7400 процессори билан смартфон соатлаб ишлатилганда ҳам, энг оғир ўйинларни ўйнаганда ҳам умуман қотмайди. 120 Герцли AMOLED экрани эса ҳар бир ҳаракатни жуда силлиқ ва ёқимли кўрсатади. Хуллас, бу кундалик фойдаланиш учун ҳақиқий қулайлик бера оладиган смартфон.

Ижтимоий тармоқлар инсонларнинг ҳаётида алоҳида муҳим ўрин эгаллаётган замондамиз ва табиийки, бу пайтда барча ўзининг энг яхши, тиниқ ва чиройли расмларини ҳамда видеоларини интернетга жойлаш ҳаракатида бўлади. Бу масалада эса ушбу смартфон сизга ёрдам беради. 108 мегапикселли асосий камера ҳамда 50 мегапикселли селфи камераси бор. Техноблогерлар ҳам янги смартфонни ижобий баҳолади.

“Телефонларни кўрдик. Connect U7 телефонини. Процессорини кўрдик, ўргандик ҳамма нарсасини ва бу телефонга ўрнатиладиган MediaTek’дан Dimensity 7400 процессори ўзи бизнинг тажрибамизда ўрта синфга мансуб бўлган телефонларга ўрнатилади. Энг қизиқарли жойи шундан чиқдики, мана ҳозир Yakuza дўстимиз билан гаплашдик, PUBG ўйнайди. Мен текшириб кўрдим, 120 FPS берди деди. Мен ўзим шахсан текширмадим ҳали, лекин унинг гапи бўйича 120 FPS. Энди у яхшироқ билса керак, PUBG бўйича энди ўзингиз биласиз. Бу нарсаси қувонтирди, чунки нархи ёқимли. Яна битта ёққан тарафи – бу, масалан, экрани тушиб қолса, синиб қолса, 360 минг сўмга янгисига алмаштирса бўлар экан. Яъни эҳтиёт қисмлари унча қиммат эмас, маҳаллий маҳсулот бўлганлиги учун”, дейди Темур Ҳотамов.

Яна бир техноблогер Одил Низомов эса смартфоннинг сунъий интеллект (AI) билан интеграция қилинганини юқори баҳолади.

“Биринчи эмоция “вов” бўлди, чунки бизга, сизга кўрсатаман, эксклюзив, биз учун алоҳида беришган анпекингга. Мен кутганимдан кўра, даражаси анча яхши. Масалан, 7Tech’даги биринчи смартфон учун мен кутган даражадан анча яхши бўлипти. Имкониятларига келадиган бўлсак, ўзининг сегментидаги ҳозирги замонавий смартфонлар билан бемалол рақобат қила олади деб ўйлайман. Замонавий смартфонлар максимал даражада сунъий интеллектни интеграция қилаётган пайтда, 7Tech ҳам биттада AI билан кириб келгани алоҳида яхши натижа бўлди деб ўйлайман”, дейди блогер.

Бугун телефон эгаларини энг кўп қийнайдиган ва кенг тарқалган муаммо бу батарея билан боғлиқ. Аммо ушбу смартфонда 5000 мА·соат сиғимга эга аккумулятор бор. Бу дегани сиз ундан кун давомида фаол фойдаланишингиз мумкин.

Берилаётган баҳолар юқори. Хўш, 7Tech компаниясининг бу янги йўналишга кириб келишдан кўзланган асосий стратегик мақсадлари нима?

“Биз миллий брендимизга асос солганлар қаторидамиз. Географик жойлашувни инобатга олсак, Ўзбекистондаги барча ишлаб чиқарувчилар учун логистика жуда муҳим масаладир. Аммо мобиль телефонлар соҳасида бизда катта устунлик бор: смартфонлар енгил ва ихчам бўлгани боис, уларни ҳаво йўллари орқали дунёнинг исталган бурчагига етказиб бериш имконияти юқори. Асосий ютуғимиз ва стратегик мақсадимиз – фақат Ўзбекистон бозори билан чекланиб қолмай, 7Tech брендини дунёга танитиш ва экспорт географиясини кенгайтиришдир. Хусусан, қўшни мамлакатлар, Яқин Шарқ ҳамда Европа бозорларига кириб бориш орқали хорижда яшаётган ҳамюртларимиз учун ҳам янги иш ўринларини яратишни мақсад қилганмиз. Халқаро бозордаги яна бир муҳим қадамимиз – яқинда брендимиз ва телефонларимизни халқаро стандартлар бўйича расмий рўйхатдан ўтказдик, бу эса жаҳон бозорига чиқишда янги имкониятларни очади. Шунингдек, биз нарх ва сифат мутаносиблигини таъминлашни бош мезон деб биламиз. Машҳур халқаро брендларни сотиб олаётганда харидорларнинг шунчаки бренд номи учун ортиқча пул тўлашини нотўғри деб ҳисоблаймиз. Биз ана шу ортиқча тўловларга чек қўйиб, мижозларга улар тўлаган пулига мос ва муносиб сифатни тақдим этамиз”, дейди 7Tech бош менеджери Элдор Ражабов.

Ўзбекистоннинг миллий бренди остидаги смартфонга бўлган қизиқиш фақат мамлакат ичида чекланиб қолгани йўқ. Тақдимотда қатнашган хорижий ҳамкорлар ушбу қурилманинг минтақавий бозордаги салоҳиятига юқори баҳо бермоқда.

“Шу йилнинг июнь ойида 7Tech компанияси билан ҳамкорликни бошладик. Ҳозирги вақтда компанияларимиз ўртасидаги товар айланмаси бир неча миллион долларни ташкил этади ва бу фақат бошланиши. 7Tech компанияси таклиф қилаётган маҳсулот ҳозирда Россиядаги харидорларимизга ёқиб қолди. Уларнинг сифати Европа сифатига мос келади. Россиялик истеъмолчининг ўзи буни айтмоқда”, деди Россиядаги Union Group компанияси раҳбари Александр Рожков.

Маҳсулотни қачон ва қаердан сотиб олсак бўлади деган савол сизда пайдо бўлгандир? Жавоб эса аниқ. Сотувлар тақдимот ўтказилган кун – шу йилнинг 20 августидаёқ бошланди. 7Tech Connect U7 – сифат, унумдорлик ва замонавий қулайликни бир нуқтага жамлаган илк қадам. Сотувлар эълон қилинди. Нархи қанча деган саволга эса бренднинг расмий саҳифаларидан жавоб топишингиз мумкин.

Web: seventech.uz
Instagram: @sevenmobile.uz
Telegram: @seventechmobile7

*Реклама ҳуқуқи асосида