Бразилиядаги намойишларда 1,5 мингга яқин одам ҳибсга олинди

Охирги икки кун ичида Бразилияда тартибсизликлар чоғида жами 1,5 мингга яқин одам ҳибсга олинди. Бу ҳақда “CNN Brasil” хабар берди.

Қайд этилишича, йўл-патруль хизмати ходимлари тартибсизликларда қатнашган 40 та автобусни ушлаган, улардан бирида ўқотар қурол бўлган.

“Кеча воқеа жойида 209 нафар фуқаро ҳибсга олинган. Бу рақам ҳар доим янгиланмоқда. Умумий 1,5 мингга яқин одам қўлга олинди”, дейди Адлия ва жамоат хавфсизлиги вазири Флавио Дино.

Вазирга кўра, тартибсизликларда иштирок этган ёки уларни молиялаштирган шахсларни аниқлаш давом этмоқда. Уларнинг барчаси яқин кунларда судга топширилади.

Эслатиб ўтамиз, Бразилиянинг собиқ Президенти Жаир Болсонарунинг юзлаб тарафдорлари намойишларга чиқиб, пойтахтдаги Олий суд, вазирликлар ва Конгресс биноларига бостириб кирди.

8 январь куни Бразилиянинг собиқ раҳбари Жаир Болсонару тарафдорлари полиция билан тўқнашиб, Миллий Конгресс (парламент), Президент саройи ва Федерал Олий судга бостириб кирди. Октябрь ойида бўлиб ўтган президентлик сайловлари натижаларини тан олмаган намойишчиларга ишламайдиган кунларда бўш турган маъмурий биноларнинг бир нечта қўриқчилари бас кела олмади. Дастлабки ҳисоб-китобларга кўра, тартибсизликларда 5 мингга яқин одам қатнашган.

Социалист Лула да Силва 1 январь куни сайловнинг иккинчи босқичида Болсонаруни мағлуб этиб, Бразилия президенти лавозимига киришди. Уларнинг орасидаги тафовут тахминан 2 миллион овозни ташкил этди. Консерватор мағлубиятни тан олмади ва унинг тарафдорлари Лула да Силванинг лавозимга киришмаслигини талаб қилиб, оммавий равишда кўчаларга ва қуролли кучлар гарнизонларига чиқди. 2022 йил декабрь ойи охирида Болсонару АҚШга жўнаб кетган.