Бош прокуратура Олмазор, Яшнобод ва Косон туманларида ўтган сайлов бўйича текширув бошлади

Жамият

image

Маълумки, 22 декабрь куни Ўзбекистонда Олий Мажлис қонунчилик палатаси ва халқ депутатлари вилоят, шаҳар ва туман кенгашларига сайловлар бўлиб ўтди. Унда умумий сайловчиларнинг 71,1%и овоз бергани маълум қилинди. Ижтимоий тармоқларда эса айрим ҳудудларда сайлов жараёнларига ижро ҳокимияти ва бошқа ташкилотлар томонидан ноқонуний аралашувлар бўлгани ҳақида турли хабарлар тарқалди. Ўзбекистон Республикаси Бош прокуратураси ушбу маълумотлар асосида текширувлар бошланганини маълум қилди. Жумладан Бош прокуратура хабарида шундай дейилади:

"Бош прокуратура штаби томонидан оммавий ахборот воситалари ва Интернет тармоғи, шу жумладан ижтимоий тармоқларда сайловга оид қонун бузилиши ҳолатлари ҳақида эълон қилинган маълумот ва хабарлар узлуксиз равишда ўрганилмоқда.

22 декабрь, яъни парламент Қонунчилик палатаси ҳамда халқ депутатлари маҳаллий кенгашларига ўтказилган сайловлар куни Интернет тармоғида айрим ҳудудларда сайловлар ўтказилишида қонун бузилиш ҳолатлари содир этилаётганлиги ҳақида маълумотлар эълон қилинди.

Хусусан, Қашқадарё вилояти Косон тумани халқ депутатлари Кенгаши депутатлигига номзоди кўрсатилган шахсларни ўз номзодларини қайтариб олишга мажбурлаш, Тошкент шаҳри Олмазор туманидаги 10, 23 ва 142-сонли сайлов участкалари ишига ноқонуний аралашиш ҳамда округ ва участка сайлов комиссияларига Тошкент шаҳри Яшнобод туманида овозларни санаб чиқиш бўйича якуний баённома нусхасини тўлдириш ва баённома нусхаларини ҳеч кимга тарқатмаслик юзасидан ғайриқонуний кўрсатма берилиши билан боғлиқ маълумотлар тармоқ орқали тарқатилиб, кенг жамоатчилик орасида муҳокамага сабаб бўлди.

Марказий сайлов комиссиясидан юқорида келтирилган маълумотлар тегишли тартибда кўриб чиқиш учун Бош прокуратурага тақдим этилди. Шу муносабат билан, тажрибали прокурор-тергов ходимларидан иборат махсус гуруҳлар шакллантирилиб, мазкур хабарларнинг ҳар бири синчковлик билан ҳар томонлама ўрганилмоқда.

Бу борада Марказий сайлов комиссияси билан яқиндан ҳамкорлик ўрнатилиб, тезкор маълумотлар алмашинуви йўлга қўйилган.

Текширишлар натижасига кўра хабар берилади".


Мақола муаллифи

Теглар

Баҳолаганлар

150

Рейтинг

2.9

Мақолага баҳо беринг

Дўстларингиз билан улашинг