Болалар учун хайрия ташкилоти фирибгарликда гумонланмоқда

Саратонга чалинган болалар учун маблағ йиғиш билан шуғулланувчи “Chance Letikva” халқаро ташкилоти фирибгарликда гумонланмоқда. Ташкилот жами 4 миллион доллар маблағни ўзлаштирган. Бу ҳақда Буюк Британиянинг BBC нашри хабар берди.

Нашр суриштирувига кўра, бир нечта оила фирибгарликда иштирок этган. Шулардан бири филиппинлик 7 ёшли Халилнинг онаси Аллин Табасадир. Она фарзанди учун маблағ йиғиш мақсадида сохта клип суратга олишга рози бўлган. Унинг сўзларига кўра, съёмкада Халилнинг сочлари олиниб, йиғлаши учун кўзлари остига ментол қўйилган ва сохта тиббий ускунага уланган.

12 соат давом этган суратга олиш ишлари учун оила 700 доллар гонорар олган, лекин Халил номига кампанияда  27 минг доллар маблағ йиғилган. Халилнинг оиласига эса бошқа ҳеч қандай сумма ажратилмаган. Аллин ташкилотдан яна маблағ ажратиладими ёки йўқлигини сўраганда, унга “компания муваффақиятсизликка учради” деб изоҳ берилган. Шу жумладан, яна 10 га яқин оилалар ҳам бошқа маблағ олмаган.

Қайд этилишича, фирибгарлик тармоғининг асосий ташкилотчиси сифатида Канадада яшовчи исроиллик Эрез Ҳадари эканлиги аниқланган. 

Ҳадарининг ёлланма ходимларидан бири бу жараён ўндан ортиқ ўхшаш ташкилотлар орқали амалга оширилишини айтиб ўтган. Ҳадарининг номи “Chance Letikva”дан ташқари “Walls of Hope”, “Saint Teresa” ва “Little Angels” каби бошқа ташкилотларнинг ҳужжатларида ҳам мавжудлиги аниқланган.

Эрез Ҳадари йиғилган пуллар реклама харажатларига кетганини айтган, лекин бу даъво хайрия бўйича экспертлар томонидан асоссиз деб топилган. Харажатлар умумий маблағнинг 20 фоизидан ошмаслиги кераклиги таъкидланган. Бундан ташқари, Халил ва бошқа болалар номидаги хайрия компаниялари ҳали ҳам интернетда фаолият юритиб, маблағ қабул қилиши ошкор қилинган. 

Нашр тиббиёт ва хайрия каби юқори-стакес мавзуларда ҳар қандай хайрия акциясига пул ўтказишдан олдин унинг расмий рўйхатдан ўтганлигини текширишни тавсия қилмоқда.

Эслатиб ўтамиз, аввалроқ, Буюк Британиядаги Уорик университети олимлари олмос асосидаги янги датчик ёрдамида саратон метастазларини аниқлаш усулини ишлаб чиққaнди.

Нигора Махаммадиева