БМТ Исроилни жинсий зўравонлик қўллаганлар “қора рўйхати”га киритди

БМТ Исроилни можаролар вақтида жинсий зўравонлик қўллаган томонлар “қора рўйхати”га киритди. Бу ҳақда Исроилнинг БМТдаги элчиси Дэнни Данон маълум қилди.

Унинг айтишича, Тель-Авив БМТ Бош котиби Антониу Гутерриш билан алоқаларни тўхтатади.

“Биз энди бу Бош котиб билан ишламаймиз”, деб ёзган Данон X ижтимоий тармоғида эълон қилган видеомурожаатида.

БМТ Бош котибининг можаролар билан боғлиқ жинсий зўравонлик ҳақидаги йиллик ҳисоботи одатда расмий эълон қилинишидан олдин тегишли давлатларга тақдим этилади. Ўтган йил август ойидаги ҳисоботда Исроил қуролли можароларда жинсий зўравонликда гумон қилинаётган ёки айбланаётган томонлар рўйхатига қўшилиши мумкинлиги айтилган.

“Исроилни қора рўйхатга киритиш ва бизни жинсий зўравонликни уруш қуроли сифатида ишлатишда айблаш – мутлақо қабул қилиб бўлмайдиган қарор”, дейди Данон.

Унинг сўзларига кўра, Исроилни ҲАМАС билан бир рўйхатга қўйишни ҳам қабул қилиб бўлмайди. Исроилнинг БМТдаги миссияси вакили эса Гутерриш ташкилот раҳбари бўлиб турган вақтда унинг офиси билан ҳеч қандай алоқа қилмаслигини маълум қилган. Исроил Ташқи ишлар вазирлиги ҳам ҳисобот юзасидан норозилик билдирган. Вазирлик вакили Орен Марморштейн X’даги саҳифасида БМТни “сиёсийлашган ва коррупциялашган ташкилот” деб атаган.

Гутерришнинг матбуот котиби Стефан Дюжаррик эса Даноннинг баёнотларидан хабардор эканини айтган ва Бош котибнинг эшиги ҳамон очиқ эканлигини билдирган. БМТнинг аёллар ва қизларга нисбатан зўравонлик бўйича махсус маърузачиси Рим Алсалем эса Исроилнинг рўйхатга қўшилишини “жуда кечиккан қарор” деб баҳолаган.

“Исроил томонидан фаластинлик аёллар, эркаклар ва болаларга қарши амалга оширилган тизимли ва даҳшатли жинсий зўравонлик ҳолатлари мустақил равишда ҳужжатлаштирилган ва тасдиқланган”, дея таъкидлаган у.

Эслатиб ўтамиз, аввалроқ Бирлашган Миллатлар Ташкилоти Исроил ҳукуматидан Ғазо секторида геноцид ҳаракатларига йўл қўймасликни талаб қилган эди.