БМТ Эрондаги қўзғалон бўйича йиғилиш ўтказади

Бирлашган Миллатлар Ташкилоти Хавфсизлик кенгаши бугун, 15 январь куни АҚШ сўровига биноан Эрондаги вазият бўйича йиғилиш ўтказади. Бу ҳақда январь ойида Хавфсизлик кенгаши раиси вазифасини бажарувчи Сомалининг жаҳон ташкилотидаги доимий ваколатхонаси маълум қилди. 

АҚШ илтимосига кўра, раислик Яқин Шарқдаги вазият кун тартиби доирасида Эрондаги вазият бўйича брифинг ўтказишни белгилади. Йиғилиш 2026 йил 15 январь куни Нью-Йорк вақти билан соат 15:00 да бўлиб ўтади.

Эрондаги вазият

Эронда 2025 йил 28 декабрь куни миллий валюта курси кескин тушиб кетганидан сўнг норозилик намойишлари бошланди. Улар полиция билан тўқнашувлар, маъмурий биноларга ҳужумлар ва бутун мамлакат бўйлаб интернетга киришни чеклаш билан бирга содир бўлди. АҚШ Президенти Дональд Трампнинг айтишича, Вашингтон Эрон расмийлари намойишчиларга қарши куч ишлатишни бошласа, аралашишга тайёр. Эрон олий раҳбари Али Хоманаий Оқ уй раҳбарини ўз мамлакати ишлари билан шуғулланишга чақирди. Эрон Хавфсизлик кенгаши тартибсизликларни уюштирганликда АҚШ ва Исроилни айблади. 

13 январь куни Трамп Эрондаги норозилик намойишлари иштирокчиларини ҳокимият органларини эгаллашга чақирди. Шунингдек, у Эрон расмийлари билан барча учрашувларни бекор қилганини маълум қилди. Россия ТИВ расмий вакили Мария Захарова Россия Эроннинг ички ишларига бузғунчи ташқи аралашувни кескин қоралашини айтди. 

Ўз навбатида, Эрон ҳукумати минтақанинг АҚШ ҳарбий базалари жойлашган давлатларини, агар АҚШ қўшинлари ҳужум бошласа, ушбу базаларга зарба беришлари ҳақида огоҳлантирди. Қатар халқаро медиа-офиси 14 январь куни АҚШ Яқин Шарқдаги энг йирик Ал-Удейд авиабазасидан ходимларнинг бир қисмини олиб чиққанини маълум қилди. 

15 январь куни Эрон халқаро рейслардан ташқари мамлакат осмонини ёпди.