Блинкен Мирзиёев ва Тўқаев билан учрашади

АҚШ Давлат котиби Энтони Блинкен Ўзбекистон Президенти Шавкат Мирзиёев ва Қозоғистон раҳбари Қосим-Жомарт Тўқаев билан икки томонлама учрашувлар ўтказишни режалаштирмоқда. Бу ҳақда кеча, 24 февраль куни АҚШ Давлат котибининг Жанубий ва Марказий Осиё бўйича ёрдамчиси Дональд Лу маълум қилди.

Қайд этилишича, Блинкеннинг жорий йил 28 февраль – 3 март кунларига белгиланган Қозоғистон, Ўзбекистон ва Ҳиндистонга ташрифи доирасида у Қозоғизтон ва Ўзбекистон раҳбарлари билан учрашади. 

Шунингдек, у Остонада Марказий Осиёнинг бешта давлати (Қозоғистон, Қирғизистон, Тожикистон, Туркманистон, Ўзбекистон) ва АҚШ ўртасидаги C5+1 форматидаги вазирлар учрашувида иштирок этади. Кўп томонлама учрашувдан сўнг Америка ташқи сиёсат департаменти раҳбари беш вазирнинг ҳар бири билан ҳам юзма-юз мулоқот ўтказиши режалаштирилган. 

“Бундан ташқари, у Қозоғистон ва Ўзбекистон Президентлари билан ҳам учрашади”, дейди Дональд Лу. 

Маълумот учун, бу ташриф Блинкен давлат котиби лавозимини эгаллагандан бери Ўзбекистонга илк маротаба келиши ҳисобланади. Олдинги давлат котиби Майк Помпео бундан уч йил олдин 2020 йил 2-3 февраль кунлари Тошкентга келган, Президент Мирзиёев ва ўша пайтдаги Ташқи ишлар вазири Абдулазиз Комилов билан учрашганди.

Эслатиб ўтамиз, олдинроқ Ўзбекистон Ташқи ишлар вазирлиги Блинкеннинг Тошкентга келаётганини тасдиқлаганди.

Алибек Бейжанов