Блинкен Алиев ва Пашинянга қўнғироқ қилиб, тинчликка кўндиришга уринди
Олам
−
28 Ноябрь 2023
3224АҚШ Давлат котиби Энтони Блинкен Озарбайжон Президенти Илҳом Алиев ва Арманистон Бош вазири Никол Пашинян билан икки давлат ўртасида тинчлик шартномасини тузиш имкониятларини муҳокама қилди. Бу ҳақда Давлат департаменти матбуот хизмати раҳбари Мэттью Миллернинг баёнотларида айтилади.
Бир баёнотга кўра, Блинкен Президент Алиевга Озарбайжон ва Арманистон ўртасида кучли ва вакиллик тинчлик шартномасини тузишга тайёрлиги учун миннатдорлик билдирган. АҚШ Давлат котиби узоқдан бери давом этаётган можаро Озарбайжонга ҳам, Арманистонга ҳам азоб-уқубат олиб келганини айтган ва тинчлик битими минтақада ҳамма учун фойдали бўлишини қайд этган. Бундан ташқари, Блинкен Алиев билан Қўшма Штатлар ва Озарбайжон ўртасидаги икки томонлама муносабатларни муҳокама қилган, сўнгги ташвишларни қайд этган, шунингдек, ҳамкорликни мустаҳкамлаш имкониятларига тўхталган.
Бошқа бир баёнотда, Америка ташқи сиёсат департаменти матбуот хизмати раҳбари Блинкен Пашинян билан суҳбатда АҚШнинг тинчлик шартномасига эришишдаги саъй-ҳаракатларини қўллаб-қувватлашини муҳокама қилганини билдирган. Шу билан бирга, Давлат котиби Арманистон суверенитети ва ҳудудий яхлитлигини қўллаб-қувватлашини эълон қилган ва Арманистон билан икки томонлама ҳамкорликни ривожлантиришга қаратилган саъй-ҳаракатларни тасдиқлаган.
18 ноябр куни Арманистон Бош вазири ЕХҲТ Парламент Ассамблеяси кузги сессиясининг очилиш маросимида Ереван ва Баку тинчлик битимининг асосий тамойиллари бўйича келиша олганини айтди. Икки кундан сўнг Озарбайжон Президенти ироқлик ҳамкасби Абдул Латиф Рашид билан музокаралар якунлари бўйича ўтказилган матбуот анжуманида икки ойдан кўпроқ вақт олдин Баку Еревана тақдим этган тинчлик шартномаси бўйича таклифларга арман томонининг жавобини кутаётганини айтган.
Жорий йилнинг 19 сентябрь куни Қорабоғда вазиятнинг навбатдаги кескинлашуви юз берди. Баку "маҳаллий аксилтеррор операцияси" бошланганини эълон қилди ва арман ҳарбийларини минтақадан олиб чиқиб кетишни талаб қилди. Ереван Қорабоғда арман қуролли кучлари йўқлигини таъкидлаб, содир бўлаётган воқеаларни “кенг кўламли тажовуз” деб атади. Россия можаро томонларини қон тўкилишини тўхтатиб, дипломатик келишувга қайтишга чақирди. 20 сентябрь куни Озарбайжон Мудофаа вазирлиги Россия тинчликпарвар контингенти иштирокида Қорабоғда аксилтеррор тадбирларини тўхтатиш бўйича келишувга эришилганини маълум қилди.
28 сентябрь куни тан олинмаган Тоғли Қорабоғ Республикаси президенти Самвел Шаҳраманян 2024 йил 1 январдан унинг фаолиятини тугатиш тўғрисидаги фармонни имзолади. Аҳолига Баку таклиф қилган реинтеграция шартларини кўриб чиқиш ва қолиш имконияти тўғрисида мустақил қарор қабул қилиш буюрилди.