Берлиннинг катта қисми “свет”сиз қолди

Бугун, 3 январь куни Германия пойтахти Берлинда кенг кўламли электр узилиши содир бўлиб, қарийб 50 минг уй электрсиз қолди. Носозликка ёнғин сабаб бўлган. Бу ҳақда “Junge Freiheit” хабар берди.

Нашр маълумотларига кўра, Берлиннинг жануби-ғарбий қисмида йирик электр узилиши юз берган. Оқибатда тахминан 50 мингта уй хўжалиги ва қарийб 2 мингта тижорат объекти электр энергиясиз қолган.

Хабар қилинишича, электр таъминотини тиклаш ишлари дастлабки баҳоларга кўра кечга қадар давом этади. Маълум бўлишича, узилишга ёнғин сабаб бўлган. Бу маълумотни шаҳар полицияси ҳам тасдиқлаган. Улар тақсимловчи подстанция ёниб кетганини билдирган.

Нашрнинг ёзишича, узилиш бир вақтнинг ўзида бир нечта туманлар ва ўнлаб кўчаларга таъсир қилган. Берлин полицияси ижтимоий тармоқларда авария сабабли нафақат электр энергияси, балки мобил алоқа ва стационар телефон алоқасида ҳам узилишлар бўлиши мумкинлигидан огоҳлантирган.

Эслатиб ўтамиз, аввалроқ Париж ва унинг чекка ҳудудларида электр қувватида йирик узилиш юз берганди. Франция пойтахтининг жануби-ғарбидаги Исси-ле-Мулино подстанциясида содир бўлган техник носозлик оқибатида айрим метро ва шаҳарлараро поезд линиялари тўхтаб қолган, светофорлар ҳамда 170 мингга яқин хонадон вақтинча электр таъминотидан узилган.