Бенинда президент алмашди

Бенинда бўлиб ўтган президентлик сайловларида собиқ молия вазири Ромуальд Ваданьи ғалаба қозонди. Бу ҳақда “24heures” хабар берди.

У амалдаги президент Патрис Талоннинг яқин ҳамкори ва вориси ҳисобланади. Дастлабки натижаларга кўра, бюллетенларнинг 90 фоизи саналгач, у 94,05 фоиз овоз тўплаган.

Унинг ягона рақиби, собиқ маданият вазири Поль Унькпе 5,95% овоз билан мағлубиятни тан олди ва ғолибни табриклади. Сайловларда иштирок даражаси 58,75 фоизни ташкил этди.

49 ёшли Ваданьи Францияда таҳсил олган, кейинчалик Deloitte компаниясида ишлаган ва 2012 йилда ҳамкор даражасига етган. У Африканинг бир қатор давлатларида компания фаолиятини ривожлантириш билан шуғулланган. 2016 йилдан бошлаб Бенин иқтисодиёт ва молия вазири лавозимида ишлаган ҳамда хусусий секторни ривожлантириш сиёсатини илгари сурган.

У президентликка ҳукмрон партия томонидан 2025 йил августида номзод сифатида кўрсатилган.

Шунингдек, 2025 йил декабрида мамлакатда давлат тўнтаришига уриниш ҳам кузатилган, бироқ у муваффақиятсиз якунланган. Вазият назорат остига олингач, минтақавий ташкилотлар томонидан хавфсизликни таъминлаш учун ҳарбий кучлар юборилган.

Бенин Ғарбий Африкада жойлашган давлат бўлиб, сиёсий тизими президентлик республикаси ҳисобланади. Сўнгги сайлов натижалари мамлакатда ҳокимият алмашинуви демократик йўл билан амалга оширилганини кўрсатмоқда.

Эслатиб ўтамиз, аввалроқ Перу қонун чиқарувчилари 83 ёшли парламент раиси Хосе Мария Балькасарни мамлакатнинг вақтинча президенти этиб сайланганди.