Беллингем ва Мбаппенинг жароҳати ҳақида маълумот берилди

Испаниянинг “Реал Мадрид” футболчилари Жуд Беллингем ва Киллиан Мбаппе Чемпионлар лигаси 1/8 финалида “Манчестер Сити”га қарши биринчи ўйинни ўтказиб юбориши мумкин. Бу ҳақда “The Athletic” нашри хабар берди.

Манбага кўра, Беллингем ҳануз сон мушакларидаги жароҳатдан тикланиш жараёнида. Мадрид клуби 22 ёшли инглиз футболчисининг 17 март куни бўлиб ўтадиган жавоб учрашувига қадар сафга қайтишига умид қилмоқда. Шунга қарамай, унинг 22 март куни “Атлетико Мадрид”га қарши Ла Лига баҳсида майдонга тушиши эҳтимоли юқорироқ деб баҳоланмоқда.

27 ёшли Мбаппенинг ҳам “Манчестер Сити”га қарши илк ўйинда майдонга тушишини кутмаяпти. Бундан ташқари, франциялик ҳужумчининг жавоб учрашувида иштироки ҳам ҳозирча сўроқ остида қолмоқда.

Ҳозирча иккала футболчининг ҳам аниқ қайтиш санаси белгиланмаган. Клуб тиббий штаби жароҳатларнинг оғирлашиб кетишидан эҳтиёт бўлиб, уларнинг тикланиш жараёнини тезлаштиришга шошилмаяпти.

Маълумот учун, “Реал Мадрид” ва “Манчестер Сити” ўртасидаги Чемпионлар лигаси 1/8 финалининг биринчи учрашуви жорий йилнинг 11 март куни “Сантьяго Бернабеу” стадионида бўлиб ўтади.