Байден Мирзиёевга мактуб йўллади

АҚШ Президенти Жозеф Байден Ўзбекистон Республикаси Президенти Шавкат Мирзиёевга мактуб йўллади. Бу ҳақда Ўзбекистон раҳбари Матбуот котиби Шерзод Асадов хабар берди. 

Мактубда Байден Мирзиёевга АҚШ ва Ўзбекистон ўртасидаги муносабатларни мустаҳкамлашда кўрсатаётган етакчилиги ва шахсий интилиши, шу жумладан хавфсизлик соҳасидаги ҳамкорлик учун чуқур миннатдорлик билдирган. 

“Ўзбекистон билан иқтисодиёт ва энергетика масалаларида ўзаро алоқаларни ривожлантириш, шунингдек, Сизнинг мамлакатни сиёсий тизимини модернизация ва ислоҳ қилиш борасидаги саъй-ҳаракатларингизни қўллаб-қувватлаш АҚШ учун устувор аҳамиятга эга”, деб ёзган Байден. 

Шунингдек, АҚШ раҳбари, АҚШ ва Ўзбекистон ўртасидаги стратегик шериклик чуқурлашиб бораётгани ва эришилган ютуқларни 2023 йилда ҳам янада илгари суришга умид билдирган. 

“Сиз Марказий Осиёдаги бешта мамлакатнинг минтақавий ҳамкорлигини кенгайтириш орқали қўшни мамлакатлар билан муносабатларни ривожлантиришга катта эътибор қаратаётганингизни алоҳида қайд этмоқчиман. 

Бу саъй-ҳаракатлар Марказий Осиёда ва унинг ташқарисида равнақ ва барқарорликни таъминлашга катта ҳисса қўшмоқда. 

Бизнинг шериклигимиз, мана 30 йилдирки, БМТнинг барча мамлакатларнинг мустақиллиги, суверенитети ва ҳудудий яхлитлигини ҳурмат қилишдек асосий принципларига риоя қилиш асосида ривожланди”, деб ёзган Байден.

АҚШ раҳбари ушбу қадриятларга муштарак содиқлиги ўзаро алоқалар узоқ муддатли истиқболда янада мустаҳкамланишига хизмат қилишига ишонч билдирган.