“Барселона” ЕЧЛдаги дурранг аламини “эль-класико”дан чиқармоқчи

Кеча, 12 октябрь куни футбол бўйича Европа Чемпионлар лигасининг 4-тури доирасида “Барселона” ўз майдонида “Интер”ни қабул қилди ва 3:3 ҳисобида дурранг ўйнади. “Кўк анорранглилар” бош мураббийи учрашувдан кейин ўтказилган матбуот анжуманида жамоаси ўйинни назорат қилганини, бироқ иккинчи бўлимда элементар хатоларга йўл қўйилганини айтди. Бу ҳақда Хавининг сўзларига таяниб, “Маrcа” нашри хабар берди.

“Биринчи бўлим яхши ўтди. Биз ташқаридан ва ичкаридан ҳужум қилдик. Ўйинга яхши тайёрлангандик. Биз марказ орқали ҳужум қилмадик. Ўйин назорат остида ўтди. Иккинчи бўлим элементар хатолардан иборат бўлди. Биринчи гол бизни руҳий жиҳатдан мувозанатдан чиқариб юборди. Иккинчи голда оддий вазиятда хатога йўл қўйдик. Бундай ҳолат элита жамоалар билан содир бўлиши мумкин эмас. Биз ишондик ва ҳаракат қилдик. Лекин ғалаба қозонишнинг иложи бўлмади. Агар ўз уйингда "Интер"ни мағлуб этмасанг, бунга (ЧЛнинг гуруҳ босқичидан чиқишга – таҳр.) лойиқ эмассан. Бизда кам имконият бўлса ҳам, рақобатда давом этмиз. ЕЧЛда кейинги босқичга чиқиш учун оз бўлса-да, умид бор. Лекин бу содир бўлиши қийин”, деган испаниялик мураббий.

Хавининг қўшимча қилишича, “Барселона” 16 октябрга қадар тикланади ва ўша куни бўлиб ўтадиган "эль-класико"да “Реал Мадрид”ни мағлуб этишга ҳаракат қилади.

“Бу жуда қаттиқ зарба бўлди. Буни қабул қилиш оғир эди. Энди биз “Реал Мадрид” ҳақида, "эль-класико" ҳақида ўйлашимиз керак. Якшанбага (16 октябрь) қадар тикланишга улгурамиз ва "Реал Мадрид"ни "Сантьяго Бернабеу"да мағлуб этишга ҳаракат қиламиз. Олдинда бошқа мусобақалар бор. Биз Чемпионлар лигасини кейинга қолдирамиз ва бор эътиборимизни Ла Лигага қаратамиз. Унда биз пешқадам бўлиб қолмоқчимиз. Чемпионлар лигасида хатоларимиз туфайли энг яхши версиямизни кўрсата олмадик”, деган “Барселона” устози.

Шунингдек, “кўк анорранглилар”нинг устози “Интер”га қарши ўйинда йўл қўйилган барча хатоларни ўз зиммасига олган.

Маълумот учун, “Барселона” Чемпионлар лигасида “C” гуруҳидан жой олган. Ортда қолган 4 та турдан кейин, 12 очко тўплаган “Бавария” гуруҳда етакчилик қилмоқда. “Интер” 7 очко билан иккичи, 4 очкога эга “Барса” эса учинчи бўлиб турибди. “Виктория Пльзень”нинг ҳисобида очко мавжуд эмас.

5-тур учрашувлари жорий йилнинг 26 октябрь санасига белгиланган. Ўша куни “Бавария” “Барселона”нинг меҳмони бўлса, “Интер” ўз майдонида “Виктория Пльзень”ни қабул қилади.