“Барселона”нинг икки ҳимоячиси жароҳат сабаб сафдан чиқди

Испаниянинг “Барселона” жамоаси “Атлетико Мадрид”га қарши ўйинда икки футболчисини жароҳат сабаб йўқотди. Бу ҳақда клуб матбуот хизмати хабар берди.

Маълум қилинишича, каталонияликларнинг қанот ҳимоячилари Алехандро Бальде ва Жюль Кунде ҳар иккаласи ҳам сон мушакларидан жароҳат олган.

Франциялик ҳимоячи Кунде “Атлетико Мадрид” билан ўйинда майдонда атиги ўн дақиқа ҳаракат қилди. У ўнг оёғининг орқа қисмида кескин оғриқни ҳис қилиб, ерга йиқилган. Биринчи тиббий ёрдам кўрсатилгач, жароҳат жиддий бўлиши мумкинлигини англаб, ўзи кийиниш хонасига йўл олган.

Орадан кўп ўтмай, Бальде ҳам шунга ўхшаш муаммога дуч келган. Маҳаллий ОАВ маълумотларига кўра, унинг жароҳати Кунденикидан ҳам оғирроқ бўлиши мумкин ва у бир неча ҳафта давомида майдонга туша олмаслиги эҳтимолдан холи эмас.

Кунденинг жароҳати бўйича дастлабки баҳолар бироз ижобийроқ. Тахминларга кўра, у ўнг сон мушагидаги кичик йиртилишдан азият чеккан бўлиши мумкин. Бу эса унинг Чемпионлар лигаси учрашувларида қатнашишига тўсқинлик қилмаслиги эҳтимолини сақлаб қолмоқда.

Маълумот учун, Жюль Кунде жорий мавсумда барча мусобақаларда 40 та ўйинда майдонга тушиб, 3 та гол ва 4 та голли узатма муаллифига айланган. Алехандро Бальде эса 34 та учрашувда қатнашиб, 3 та голли узатмани амалга оширган.