“Барселона” Балдени сотиш учун нарх белгилади

“Барселона” клуб ҳимоячиси Алекс Балденинг трансфер қийматини 40 миллион евродан юқори деб белгилади. Бу ҳақда “Sport.es” хабар берди.

Манбага кўра, каталонияликлар янги трансферлар учун маблағ ажратиш мақсадида Балдени январь ойида тўлиқ сотишни ёки мажбурий сотиб олиш банди билан ижарага беришни афзал кўрмоқда. Бу позиция футболчининг агенти Хорхе Мендешга ҳам етказилган.

Италиянинг “Ювентус” ва “Рома” клублари ҳимоячига қизиқиш билдирган. Бироқ ҳар икки жамоа уни ижарага олиш имкониятини кўриб чиқмоқда. Балденинг маоши эса улар учун муаммо бўлиши мумкин.

Англияда “Манчестер Юнайтед” ва “Челси” футболчига қизиқиш билдирган. “Ливерпуль” ҳамда “Манчестер Сити” эса вазиятни кузатиб бормоқда, аммо ҳозирча Балдени трансфер қилиш бўйича аниқ режага эга эмас.

Маълумот учун, Алекс Балде жорий мавсумда “Барселона” сафида тўртта учрашувда майдонга тушди ва уларнинг ҳеч бирида асосий таркибда иштирок этмади. У Жоау Канселу ва Хави Эспартга асосий таркибдаги ўринни бой бермоқда.