“Барселона” Алварес билан келишувга эришди

“Барселона” “Атлетико” ҳужумчиси Хулиан Алварес билан шартнома борасида шахсий келишувга эришди. Бу ҳақда инсайдер Сесар Луис Мерло хабар берди.

Манбага кўра, Каталония клуби раҳбарияти ҳозирда Мадрид жамоасига расмий таклиф тайёрламоқда. Бироқ “матрасчилар” ўз футболчиларини келишувга қўшиш ниятида эмас ва трансферни пул компенсацияси орқали ҳал қилишни режалаштирмоқда. “Атлетико Мадрид” аргентиналик футболчини тахминан 150 миллион еврога сотиш вариантини кўриб чиқишга тайёр.

Маълумотларга кўра, Хулиан Альварес бир неча ой аввал “Атлетико”нинг янги шартнома таклифини рад этган ва клуб раҳбариятига жамоани тарк этиш истагини билдирган. “Барселона” эса ҳозирда футболчи билан шахсий шартнома шартларини келишиб олган ва яқин вақт ичида “Атлетико”га расмий таклиф жўнатади.

Маълумот учун, Алварес 2024 йилнинг ёзида “Манчестер Сити”дан трансфер қилинганидан сўнг Мадрид клубига қўшилган эди. Ушбу мавсумда ҳужумчи барча мусобақаларда 49 та ўйинда майдонга тушиб, 20 та гол урди ва тўққизта голли узатмани амалга оширди.