“Барселона” ҳозир ҳам “Реал”дан кучлироқ – Пике

“Барселона” ва Испания терма жамоасининг собиқ ҳимоячиси Жерар Пике янги мавсум олдидан “Барселона” “Реал Мадрид”дан кўра кучлироқ эканлигини айтди. Бу ҳақда Пике “Sport.es” нашрига берган интервьюсида сўз очди.

“Барселона” ҳозир ҳам “Реал Мадрид”дан устун. Сўнгги икки чемпионлик жамоага катта ишонч ва ғолиблик руҳини олиб келди. Шунинг учун улар янги мавсумни асосий фаворит сифатида бошлайди. Аммо бу устунликни майдонда яна бир бор исботлаш керак.
Футболчилар ва жамоа ҳозирги тизимга тўлиқ мослашиб бўлган. Энг муҳим омил – барқарорлик. Ҳанси Флик жамоа билан уч йилдан буён ишлаяпти, футболчилар эса унинг ўйин услуби ва ишлаш тартибини тўлиқ ўзлаштиришган. Бу эса “Барселона”га қўшимча устунлик беради”, дейди Пике.

Маълумот учун, 37 ёшли Жерар Пике “Барселона” академияси тарбияланувчиси ҳисобланади. Бироқ у ёшлар жамоасидан тўғридан-тўғри “Манчестер Юнайтед”га йўл олган. Орадан тўрт йил ўтиб, каталонияликлар сафига қайтган ҳимоячи клуб учун жами 616 та учрашувда майдонга тушиб, 53 та гол урган ва 13 та голли узатмани амалга оширган.

Эслатиб ўтамиз, аввалроқ Мадриднинг “Реал” жамоаси Берналду Силва, Марк Кукурелья, Дензел Дюмфрисдан кейин “РБ Лейпциг” клуби ярим ҳимоячиси Ян Диомандени трансфер қилганди.