“Бахтни сотиб ололмайсан”. 25 йилдан кейин топилган йигит миллиардер ота-онасини ташлаб, ҳақиқий оиласига қайтди

Болалигида ўғирлаб кетилган ва миллиардерлар оиласи томонидан асраб олинган хитойлик фуқаро 25 йилдан сўнг миллионер ота-онасини топди ва асраб олган оиласини ташлаб, уларга қайтишга қарор қилди. Бу ҳақда SCMP хабар берди.

Гап шундаки, хитойлик Мэй Чжигиан икки ёшида ўғирлаб кетилган. У Юньнань провинциясидаги уйи олдидан олиб қочилган. Чжигианнинг ота-онаси, Цзянсу провинциясидан келган муҳожирлар – Мэй Сяньхуа ва Пань Чан кўп йиллар давомида уни топишга астойдил ҳаракат қилган. Оила, жумладан, ўғирланган боланинг катта опаси ва икки укаси уни эслаб, ҳар йили туғилган кунини нишонлашарди. Ота-онаси бир кун қайтиб келади, деган умидда унга уй сотиб олган. 

Қидирув 2022 йил июнь ойида муваффақиятли якунланди. Оиланинг дўсти, яъни 12 йил олдин ўғирлаб кетилган ўғлини қидираётган Ду Сяохуа уларга Чжигиан билан ДНК мослигини топишга ёрдам берган. Маълум бўлишича, у Фуцзянь провинциясида бадавлат ота-оналар билан яшаган. Чжигианнинг айтишича, уни бошқа оила одам савдогарларидан сотиб олган, бироқ кейинчалик у жуда кичик ва озғин бўлгани учун ташлаб кетган.

Кейин уни миллиардер оила асраб олган. Йигит икки опа ва бир укаси билан катта бўлган. Уларнинг барчаси уни асраб олган эр-хотиннинг биологик фарзандлари эди. Чжигиан ҳар доим ўзини уларнинг ҳақиқий ўғли эмаслигини ҳис қилган. У мактабни тугатгандан сўнг ўқишга кирмаган ва дарҳол уни асраб олган ота-онасига тегишли шифохонада ишлай бошлаган. Улар унинг университетда ўқишини фойдасиз деб ҳисоблаган.

Чжигианнинг ўз оиласи асраб олган оиласига нисбатан оддийроқ эди. Топилган йигит ўзининг оиласида бегонадек ҳис қилмаслигини айтган. У оддий ҳаёт кечиришни исташини айтиб, бахтни пулга сотиб ололмаслигини таъкидлаган ва ҳақиқий оиласига қайтган. Ҳозир Чжигиан унинг биологик ота-онасига тегишли бўлган меҳмонхоналар учун маҳсулот етказиб берувчи компанияда ишлайди. Оқсоқол Мэй катта ўғлига бизнесни бошқаришни ўргатишини ва охир-оқибат компанияни унга топширишини айтган.

Ижтимоий тармоқ фойдаланувчилари бу воқеага илиқ муносабат билдиришди. Улар унинг биологик ота-онаси билан қолиш қарорини тушунишларини айтишган. 

“Асраб олган оиласи миллиардерлар, хўш, нима бўпти? Унинг болалиги бахтли ўтмаган. Энди у ўз бахтини топганидан хурсандман”, дейди улардан бири.