"Бахмут қассоби” бўлган Александр Сирский ҳақида нималар маълум?

Украина Президенти Владимир Зеленский Валерий Залужний ўрнига қуруқликдаги қўшинлар қўмондони Александр Сирскийни Украина Қуролли кучлари бош қўмондони этиб тайинлади. Хўш, Сирский ҳақида нималар маълум?

Александр Сирский Россияда – 1965 йил 26 июлда Владимир вилояти, Киржачский тумани Новинки қишлоғида туғилган. Москва олий қўшма қурол қўмондонлик билим юртини тамомлаган. Хизматни 1986 йилда Совет армияси сафларида мотоўқчилар отряди командири сифатида бошлаган.

2000-2002 йилларда у Украина Қуролли кучларининг Белой Церквдаги (Киев вилояти) 72-алоҳида механизациялашган дивизияси штаб бошлиғи ва қўмондоннинг биринчи ўринбосари бўлган, кейинчалик уни бошқарган.

2007 йилда у штаб бошлиғи – Украина Қуролли кучлари Бирлашган Оператив Қўмондонлиги қўмондони биринчи ўринбосари этиб тайинланган.

2011-2012 йилларда Украина Қуролли кучлари Бош штабининг Ҳарбий ҳамкорлик ва тинчликпарварлик операциялари бош бошқармаси бошлиғининг биринчи ўринбосари бўлган.

2013 йилда у Украина Қуролли кучлари Бош қўмондонлик маркази раҳбарининг биринчи ўринбосари лавозимида ишлаган ва НАТО билан ҳамкорликни назорат қилган, хусусан, Украина Қуролли кучларини альянс стандартларига мослаш бўйича музокараларда Украина томонидан вакиллик қилган.

2014 йилда Украина шарқида ҳарбий ҳаракатлар бошланганидан сўнг, у Террорга қарши операция қўмондони ўринбосари этиб тайинланган. 2015 йил бошида у Донецк ва Луганск вилоятларидаги Террорга қарши операция бошлиғининг биринчи ўринбосари – штаб бошлиғи лавозимини эгаллади.

2015 йил қишда у Дебальцево ва Углегорск учун жангларда қатнашган. Дебальцевода у “Барс” тактик гуруҳининг қўмондони эди. 

Россиянинг ҳужуми бошланиши билан у қуруқликдаги қўшинлар қўмондони бўлган. У Украина Қуролли кучлари учун муваффақиятли операцияларни – Киевни мудофаа қилиш ва 2022 йил кузида Харьков вилоятида ҳужумни бошқарган. Харьков ҳужумидан сўнг улар Залужнийнинг ўрнини босиши мумкинлиги ҳақида гаплар тарқалган. 

2023 йилда Сирский Украина Қуролли кучлари учун унчалик муваффақиятли бўлмаган Бахмут учун жангларга қўмондонлик қилди. Ушбу операциядаги катта йўқотишлар туфайли у "Генерал 200" ва "Бахмут қассоби" лақабларини олди.

Александр Сирский ташаббуси билан Украина Қуролли кучларида НАТО намунасидаги захира тайёрлаш тизими жорий этилган ва қуруқликдаги қўшинлар қўмондонлиги таркибида учта ихтисослаштирилган қўмондонлик ташкил этилган.

“The Washington Post” ёзганидек, 58 ёшли Сирский оддий жангчилар орасида унчалик машҳур эмас. Уларнинг кўпчилиги уни Бахмутда узоқ вақт давомида чекинишга рози бўлмаган ҳолда ўз қўшинларини ўққа тутган "совет услубидаги қўмондон" деб билишади.