Бағдодийдан кейинги ИШИД олий раҳнамоси ўлдирилди

АҚШ махсус кучлари Сурияда ўтказилган операция давомида Ал-Бағдодийдан кейинги ИШИД раҳбари этиб тайинланган Абу Иброҳим ал-Ҳошим ал-Қурайшийни йўқ қилди. Бу ҳақда АҚШ Президенти Жо Байден бугун, 3 февраль куни Сурия шимоли-ғарбида ўтказилган контртерроризм миссиясига бағишланган матбуот анжуманида маълум қилган. 

Президент Байденга кўра, махсус тадбир кеча, 2 февраль куни кечқурун ўтказилган. 

Билдирилишича, ушбу махсус операция 2019 йил АҚШ ИШИД собиқ раҳбари Ал-Бағдодий ўлдирилиши ортидан ўтказилган энг йирик ҳарбий амалиёт саналади. 

“Жасур ва тажрибали ҳарбийларимиз шарофати билан кечаги махсус операция мобайнида ИШИД олий раҳнамоси Абу Иброҳим ал-Ҳошим ал-Қурайший ўлдирилди. Жанг майдонидан барча Америка фуқаролари ва ҳарбийлар ватанга соғ-омон қайтишди”, дея таъкидлаган АҚШ Президенти. 

“White Helmets” Сурия фуқаро мудофааси гуруҳининг билдиришича, ўтказилган рейд чоғида яна 13 киши ҳалок бўлган. Қурбонларнинг 6 нафари ёш болалар ва 4 нафари аёллар экани айтилмоқда. 

Пентагон матбуот котиби Жон Кирбига кўра, миссия Яқин Шарқдаги ҳарбий амалиётлар ва ҳаракатларни назорат қилувчи АҚШ Марказий қўмондонлиги томонидан амалга оширилган.

Ҳозирча Пентагон махсус операция бўйича ортиқча маълумотларни очиқламаган. Аммо, воқаега гувоҳ бўлганлар ва қутқарув гуруҳининг CNN’га билдиришича, АҚШ ҳаво кучлари тун ярмида Сурия-Туркия чегарасида жойлашган Атмеҳ ҳудудидаги жангрилар қароргоҳига ҳаводан снаряд ташлаган. 

Нобуд бўлган 13 кишидан ташқари яна 2 кишининг жароҳат олгани ҳам билдирилмоқда. 

Воқеага гувоҳ маҳаллий аҳоли вакилининг қўшимча қилишича, ҳужум давомида бино камида учта АҚШ ҳарбий вертолёти томонидан бир неча дақиқа давомида тинимсиз ўққа тутилган. 

Маълумотларга кўра, рейд ўтказилган бинода ИШИДдан ташқари Ал-Қоидага алоқадор Ҳайят Таҳрир аш-Шам гуруҳи вакиллари ҳам бўлган. 

Маълумот ўрнида, АҚШ ҳарбийлари йўқ қилгани айтилаётган Абу Иброҳим ал-Ҳошим ал-Қурайший 2019 йил 31 октябрдан буён ИШИД олий раҳнамоси эди. У 2019 йилда Қўшма Штатлар махсус кучлари ўлдирган ИШИД собиқ раҳнамоси Ал-Бағдодий ўрнига тайинланган.