Автомобиллар устахонасида 3 та машина ёниб кетди

Гулистон шаҳри “Намуна” маҳалласи Бунёдкор кўчасида автомобилларга техник хизмат кўрсатиш устахонасида ёнғин юз берди. Бу ҳақда Ўзбекистон Республикаси ФВВ ЁХББ Матбуот хизмати хабар берди.

Кеча, 28 ноябрь куни соат 05:59 да Сирдарё вилояти Гулистон шаҳри “Намуна” маҳалласи Бунёдкор кўчасида жойлашган “Якка тартибдаги тадбиркор Б.Жумабоев”га тегишли автомобилларга техник хизмат кўрсатиш устахонасида ёнғин бўлаётганлиги ҳақида ёнғин-қутқарув хизматига хабар келиб тушган.

Воқеа жойига 2 та ёнғин ўчириш бўлинмалари жалб этилган. Бўлинмалар зудлик билан етиб борган ва ёнғин соат 06:07 да ўраб олиниб, соат 06:34 да тўлиқ бартараф этилган.

Ёнғин ўчирувчиларнинг тезкор ҳаракатлари натижасида ёнғиндан устахона биносининг 100 кв метр майдони сақлаб қолинган ва қўшни биноларга аланга ўтиб кетиши олди олинган. Ҳалок бўлган ва тан жароҳати олганлар йўқ. 

Ёнғин оқибатида устахонанинг ички қисми 30 кв м майдонда ва ичида бўлган таъмирлашга олиб келинган 3 та енгил автомобиль: фуқаро Ш.Ю.га тегишли Lacetti, фуқаро Х.М.га тегишли ВАЗ 21-011 ҳамда фуқаро О.Б.га тегишли ВАЗ 2106 тўлиқ ёнган. Ёнғин сабаби ва моддий зарар миқдори аниқланмоқда.
 

Шаҳноза Тўрамуротова