Австралиялик Паралимпиада чемпиони вафот этди

Токио-2020 Паралимпиада ўйинларида Австралияга илк олтин медални олиб берган пара-велосипедчи Пейж Греко 28 ёшида вафот этди. Бу ҳақда “SBS Australia” нашри хабар берди.

Маълум қилинишича, Греко 16 ноябрь куни Аделаидадаги уйида “тўсатдан юзага келган тиббий ҳолат” туфайли ҳаётдан кўз юмган. Греко сўнгги бор 2025 йил август ойида Бельгия мезбонлик қилган UCI пара-велоспорт бўйича Жаҳон чемпионатида иштирок этиб, шосседа бронза медалини қўлга киритган эди.

Токио-2020 Паралимпиадасида Греко аёллар C1–C3 тоифасида 3000 метрга индивидуал пойгада жаҳон рекордини янгилаб, олтин медални қўлга киритганди. Шунингдек, у C1–C3 шоссе пойгаси ва вақт синовида бронза медалларини қўлга киритган эди. Австралия Паралимпия қўмитаси бош директори Кемерон Мюррей уни “ақлли, хотиржам ва бошқаларга илҳом бағишлайдиган спортчи” сифатида эътироф этди.

Мия фалажи билан туғилган Греко дастлаб пара-югуриш бўйича мусобақаларда иштирок этган. 2016 йил Рио ўйинларига йўлланмани қўлга кирита олмагач, эътиборини велоспортга қаратган ва қисқа вақт ичида жаҳон саҳнасига кўтарилган эди. Греко 2022 йилда Австралия ордени билан тақдирланган.
Паралимпиада қўмитаси австралиялик спортчининг яқинларига ёрдам беришда давом этишини ва унинг меросига ҳурмат бажо келтирилишини маълум қилди. 

Эслатиб ўтамиз, аввалроқ Сербиянинг “Раднички 1923” жамоаси бош мураббийи, 44 ёшли босниялик мутахассис Младен Жижович миллий чемпионат доирасидаги “Младост Лучани”га қарши ўйин давомида юрак хуружидан вафот этган эди.