“Арсенал”нинг собиқ футболчиси вафот этди

“Арсенал”нинг собиқ футболчиси Билли Вигар ўтган дам олиш кунлари “Чичестер Сити” сафида ўйнаган учрашувда миясидан жиддий жароҳат олиб, 21 ёшида ҳаётдан кўз юмди. Бу ҳақда клуб матбуот хизмати хабар берди.

“Чичестер Сити” ва “Уингейт энд Финчли” жамоалари учрашувида юз берган бахтсиз ҳодисадан кейин учрашув тўхтатилган. Дастлабки хабарларга кўра, Вигар майдон четидаги деворга урилиши оқибатида оғир жароҳат олган.

“Ўтган шанба куни жиддий мия жароҳати туфайли Билли комага тушди. Сешанба куни у ҳаёт учун курашда операцияга муҳтож бўлди. Гарчи жарроҳлик ёрдам берган бўлса-да, жароҳат жуда оғир бўлиб, пайшанба куни эрталаб Билли ҳаётдан кўз юмди”, дейди Вигарнинг оила аъзолари.

Шунингдек, клуб ҳам футболчининг спортга бўлган муҳаббатини эътироф этди.

“Биллига билдирилган меҳр ва самимий изҳорлар унинг футбол оламида қанчалик севилганини кўрсатади. Унинг оиласи бу фожиа айнан ўзи энг кўп яхши кўрган ишни қилаётганда юз берганидан ниҳоятда қайғуда”, дейилади клуб баёнотида.

Маълумот учун, 27 сентябрь куни бўлиб ўтиши режалаштирилган “Чичестер Сити” – “Льюис” учрашуви қолдирилди. Қолган барча ўйинлардан аввал бир дақиқалик сукут эълон қилинади ва футболчилар ўйинда қора боғич билан ҳаракатланади.

Эслатиб ўтамиз, аввалроқ “Бунёдкор” жамоаси мураббийи Сергей Арслонов вафот этганди.