“Арсенал” аргентиналик ҳужумчи учун курашга қўшилди

Лондоннинг “Арсенал” жамоаси “Атлетико Мадрид”нинг аргентиналик ҳужумчиси Хулиан Альвареснинг трансфер қилиш имкониятларини ўрганмоқда. Бу ҳақда ESPN нашри хабар берди.

Манбага кўра, “Атлетико Мадрид”да 12 йил давомида фаолият юритган, ҳозирда “Арсенал”нинг спорт директори бўлган Андреа Берта “Атлетико” ҳужумчиси Хулиан Алвареснинг агенти Фернандо Идальго билан яхши муносабатларни сақлаб келмоқда.

Манба маълум қилишича, “Арсенал” вакиллари аргентиналик футболчига расман қизиқиш билдиришдан олдин унинг Мадриддан кетиш эҳтимоли бор-йўқлигини аниқлаш мақсадида футболчининг атрофидагилар билан норасмий музокаралар ўтказган.

Қайд этилишича, Алварес шартномасида 500 миллион евро миқдоридаги товон пули банди мавжуд. Бироқ, агар “матрасчилар” ёзда футболчини сотиш ҳақида ўйласа, унинг нархи 100 миллион евродан юқори бўлиши мумкин.

Маълумот учун, Хулиан Алварес “Атлетико Мадрид” сафида 2024 йил ёзидан буён тўп суриб келмоқда. Жорий мавсумда у барча мусобақаларда 28 та учрашувда иштирок этиб, 11 та гол урди ҳамда 5 та голли узатмани амалга оширди. Футболчининг клуб билан амалдаги шартномаси 2030 йил ёзига қадар амал қилади.