Арсен Венгер FIFA президенти бўлиши мумкин

“Арсенал”нинг собиқ бош мураббийи Арсен Венгер Халқаро футбол федерацияси (FIFA) президенти лавозимига номзодини қўйиши мумкин. Бу ҳақда “L’Équipe” нашри хабар берди.

Манбага кўра, Венгер келаси ҳафтанинг ўрталарига қадар якуний қарор қабул қилишни режалаштирмоқда. Аввалроқ, Буюк Британиянинг “The Times” нашри FIFA’нинг амалдаги президенти Жанни Инфантинонинг рақиблари Венгерни ташкилотнинг навбатдаги президентлик сайловларида иштирок этишга кўндиришга уринаётгани ҳақида хабар берган.

Сайловлар 2027 йил март ойида Марокашда бўлиб ўтади. Номзодлар иштирок этиш учун аризаларини жорий йилнинг 18 ноябрга қадар топширишлари мумкин.

Венгер ҳозирда FIFA’нинг глобал футболни ривожлантириш бўйича раҳбари ҳисобланади.

FIFA’нинг амалдаги президенти Жанни Инфантино 2016 йил февраль ойидаги навбатдан ташқари конгрессда FIFA президенти этиб сайланган. Кейинчалик у икки марта рақибсиз қайта сайланган.

Маълумот учун, 77 ёшли Арсен Венгер 1996 йилдан 2018 йилгача “Арсенал”ни бошқарган. Унинг раҳбарлигида Лондон клуби 3 марта Англия чемпионлигини, 7 марта Англия кубогини ва Англия Суперкубогини қўлга киритган. Франциялик мутахассис мураббийлик фаолияти давомида Япониянинг “Нагоя”, шунингдек, Франциянинг “Нанси” ва “Монако” клубларида ҳам ишлаган. “Монако” билан Франция чемпионлиги ва мамлакат кубогини қўлга киритган.