Аргентиналик мухлисларга ўқ узилди

Жаҳон чемпионати доирасидаги Аргентина – Жазоир учрашуви олдидан АҚШнинг Канзас-Сити шаҳрида аргентиналик мухлислар кетаётган автомобилга ўқ узилди. Бу ҳақда “New York Post” нашри хабар берди. 

Маълумотларга кўра, аргентиналик мухлислар гуруҳи таксида ҳаракатланаётган вақтда уларга қарата ўқ узилган. Мухлисларнинг айтишича, уларнинг автомобили ортида келаётган бошқа машина тўхтаган ва шундан сўнг икки марта ўқ отилган.

Гувоҳларнинг сўзларига кўра, воқеа жойига полиция етиб бориб, кўрсатмаларни қайд этган. Кейинчалик мухлислар патруль автомобиллари кузатувида стадионга олиб борилган. Ҳодисанинг сабаблари ҳозирча номаълум бўлиб қолмоқда.

Маълумот учун, Аргентина ва Жазоир терма жамоалари ўртасидаги учрашув 3:0 ҳисобида Лотин Америкаси вакилларининг ғалабаси билан якунланди. Ўйинда Аргентина терма жамоаси сардори Лионель Месси хет-трик қайд этган ҳолда Жаҳон чемпионатлари тарихидаги энг яхши тўпурарга айланганди.