Аргентина Президенти телевидение орқали халқига мурожаат қилди

Аргентина Президенти Хавьер Милей Фолкленд ороллари атрофида нефть қазиб олиш лойиҳаларида иштирок этаётган компанияларга нисбатан санкцияларни кучайтириш, мамлакат жанубида мудофаа салоҳиятини ошириш ва миллий суверенитетни ҳимоя қилишга қаратилган қонун лойиҳасини Конгрессга киритишини маълум қилди. Бу ҳақда у давлат телевидениеси орқали мурожаатида сўз очди.

Милей мурожаатида Аргентина ҳукумати ороллар атрофида нефть ва газ қазиб олиш лойиҳаларида иштирок этаётган компанияларга нисбатан амалдаги қонунчилик асосида жазо чораларини тезлаштириш бўйича фармон имзолашини айтган.

Унинг таъкидлашича, санкциялар нафақат лойиҳаларда бевосита иштирок этаётган компанияларга, балки уларнинг акциядорлари, директорлари ва етказиб берувчиларига ҳам татбиқ этилади. Аргентина ҳудудида ороллардаги лойиҳаларда Аргентина рухсатисиз бевосита ёки билвосита иштирок этувчи компанияларга фаолият юритиш тақиқланиши билдирилган.

Милей, шунингдек, мамлакат жанубида мудофаа ресурсларини кенгайтириш бўйича фавқулодда фармон чиқарилишини маълум қилган. Бу маблағлар Тьерра-дель-Фуэго вилоятида ҳарбий-денгиз базаси қуриш ва телекоммуникация имкониятларини кучайтиришга йўналтирилади.

Аргентина Президенти Конгрессга миллий суверенитетни ҳимоя қилиш” тўғрисида шошилинч қонун лойиҳасини ҳам тақдим этишини айтган. Ҳужжат ороллар атрофида рухсатсиз фаолият учун жазоларни кучайтириш, санкцияларни етказиб берувчиларга ҳам татбиқ этиш ва Аргентина табиий ресурсларига таъсир кўрсатувчи бошқа фаолият турларини қамраб олишни назарда тутади.

Милейнинг айтишича, Аргентина Навитас Петролеум ва Рокхоппер Эксплорейшн компаниялари амалга ошираётган Sea Lion денгиздаги лойиҳаси яқин ойларда нефть қазиб олишни бошлаши мумкинлигини аниқлаган. Президент ушбу лойиҳани Аргентина манфаатлари учун “жиддий таҳдид” деб баҳолаган.

Милейнинг сўнгги баёнотлари унинг Фолкленд ороллари масаласида позицияси кескинлашаётганини кўрсатмоқда. У аввалроқ Буюк Британия билан муносабатларни яхшилашга ҳаракат қилган ҳолда, ороллар бўйича баҳсни дипломатик йўл билан ҳал қилиш тарафдори эканини билдирган эди.

Маълумот учун, Фолкленд ороллари Аргентина материгидан тахминан 500 километр шарқда жойлашган бўлиб, ҳозир Буюк Британия назорати остида. Аргентина оролларга нисбатан ҳудудий даъволарини сақлаб келмоқда. Икки давлат 1982 йилда ороллар устидан қисқа муддатли уруш олиб борган.

Эслатиб ўтамиз, аввалроқ Аргентина Президенти Хавьер Милей 2026 йилги Жаҳон чемпионати давомида мамлакат миллий терма жамоасига нисбатан билдирилган танқидлар бир нечта давлатлар томонидан мувофиқлаштирилган кампаниянинг бир қисми бўлганини даъво қилганди.