Аргентина “олтин паспорт” дастурини ишга туширади

north_east

Вануатудан Мисргача: “олтин паспорт” нима беради?

Аргентина Жанубий Америкада инвестиция эвазига фуқаролик олиш имконини берувчи “олтин паспорт” дастурини ишга туширди. Бу ҳақда Иқтисодиёт вазири Луис Капуто Парижда бўлиб ўтган Аргентина ҳафталигида эълон қилди.

Жорий йилнинг 2 октябрь санасида Аргентина Иқтисодиёт вазири Луис Капуто Вазирлар Маҳкамаси раҳбари Диего Сантили билан биргаликда Парижда бўлиб ўтган Аргентина ҳафталигида мамлакатнинг инвестиция орқали фуқаролик дастури ишга туширилганини эълон қилган. Қайд этилишича, дастур жорий йилнинг тўртинчи чорагида аризаларни қабул қилиш учун оператив ҳолатга келади.

Аргентина Иқтисодиёт вазирлигининг маълум қилишича, янги дастур доирасида фуқаролик олишни истаган хорижликлар икки йўлдан бирини танлаши мумкин. Бунинг учун Миллий ғазначиликка 350 минг АҚШ доллари миқдорида қайтарилмайдиган бадал тўлаш ёки 800 минг долларлик давлат облигацияларини сотиб олиш талаб этилади. Вазирликнинг билдиришича, ҳукумат бу орқали мамлакатга йирик сармоядорларни жалб қилишни мақсад қилган.

“Олтин паспорт” эгасининг 25 ёшгача бўлган фарзандлари ҳамда турмуш ўртоғи ҳам дастурда иштирок этиши мумкин. Аргентина фуқаролари, шунингдек, МЕРКОСУРга аъзо ва унга ассоциацияланган давлатлар, жумладан Бразилия, Чили, Парагвай ва Уругвай ҳудудларида яшашлари ва ишлашлари мумкин.

Муваффақиятли аризачилар кенг кўламли визасиз саёҳат қилиш ҳуқуқини берувчи ҳамда кўчиб ўтиш мажбуриятини юкламайдиган Аргентина фуқаролигини қўлга киритади, бу эса ушбу дастурни халқаро миқёсда ҳаракатланувчи инвесторлар учун жозибадор қилади.

Аризачилар шахсни тасдиқлаш, маблағ манбаси, молиявий келиб чиқиш, жиноий ва репутацион маълумотлар, миграция тарихи ҳамда юрисдикцион хавф-хатарларни қамраб олувчи ҳар томонлама синчковлик билан ўтказиладиган текширув жараёнидан ўтишлари керак бўлади.

Эслатиб ўтамиз, аввалроқ Қозоғистон хорижликлар учун янги “олтин виза” дастурини жорий қилаётгани ҳақида хабар берилган эди. Ушбу визани олиш учун инвесторлар камида 300 минг АҚШ доллари миқдорида сармоя киритиши лозим.