Аргентина гуруҳ босқичини юз фоизлик натижа билан якунлади

Аргентина миллий терма жамоаси 2026 йилги Жаҳон чемпионати гуруҳ босқичининг учинчи турида Иорданияни 3:1 ҳисобида мағлуб этди. Натижада амалдаги чемпионлар гуруҳ босқичини 100 фоизлик натижа билан якунлаб, плей-оффга чиқди.

АҚШнинг Техас штати, Арлингтон шаҳрида бўлиб ўтган учрашувда аргентиналикларнинг голларига Жовани Ло Чельсо (19), Лаутаро Мартинес (31, пенальти) ва Лионель Месси (80) муаллифлик қилди. Иорданиянинг ягона голини эса Мусо Ал-Тамари 55-дақиқада киритди.

Ўйинда киритилган голларни ушбу ҳавола орқали томоша қилишингиз мумкин.

Гуруҳнинг иккинчи учрашувида Австрия ва Жазоир 3:3 ҳисобида дуранг ўйнади.

Шу тариқа, учта учрашувда ҳам ғалаба қозонган Аргентина 9 очко билан “Ж” гуруҳида биринчи ўринни эгаллаб, плей-офф босқичига йўл олди.

Австрия ва Жазоир 4 очкодан тўплади. Австрия қўшимча кўрсаткичлар бўйича иккинчи ўринни эгаллаган бўлса, Жазоир энг яхши учинчи ўрин соҳиблари қаторида плей-офф йўлланмасини қўлга киритди.

Иордания эса учала учрашувда ҳам мағлуб бўлиб, гуруҳни сўнгги ўринда якунлади.