Apple яна дунёдаги энг қиммат компанияга айланди

Apple бозор қиймати бўйича Nvidia’ни ортда қолдирди ва дунёдаги энг қиммат компанияга айланди. Бу ҳақда “Bloomberg” хабар берди.

Қайд этилишича, кеча, 17 июль куни Nvidia акциялари 3,7 фоизга пасайган, оқибатда компаниянинг бозор қиймати 4,8 триллион долларга тушиб кетган. Ўз навбатида, Apple акциялари 0,4 фоизга ўсиб, компания капитализацияси 4,9 триллион долларга етган.

Nvidia 2025 йилнинг май ойидан бери биржадаги энг қиммат компаниялар рейтингини бошқариб келаётган эди. Октябрь ойида унинг капитализацияси беш триллион долларгача етганди.

“Энг қиммат компаниялар рўйхатида етакчининг алмашгани инвесторлар ўз эътиборларини Nvidia каби сунъий интеллект (СИ) бумининг “энг яққол наф кўрувчилари доирасидан ташқарига” кенгайтира бошлаганидан далолат беради”, деб қайд этади “Reuters”. 

Таҳлилчиларнинг сўзларига кўра, Apple ўз моделларини ривожлантиришга маблағ сарфламагани сабабли СИ пойгасида ортда қолаётган деб ҳисобланар эди, аммо энди “кайфият ўзгарди”.

“Apple хизматлар, фойдаланувчиларни ўз экотизимига боғлаш ва қурилмаларни янгилаш орқали сунъий интеллектдан пул ишлаш учун анча қулай позицияга эга. Қайта баҳолаш СИ билан боғлиқ бўлган спекулятив ўсишни эмас, балки компания фойдасининг барқарорлигига бўлган ишончни акс эттиради”, дейди “BRI Wealth Management”нинг инвестициялар бўлими раҳбари Тони Медоуз.

Эслатиб ўтамиз, аввалроқ Apple хотира чиплари тақчиллиги сабаб Mac ва iPad қурилмалари нархларини оширгани ҳақида хабар берилган эди.