Apple iPhone X’ни эскирган қурилмалар рўйхатига киритди

Apple корпорацияси iPhone X смартфонини эскирган қурилма деб эътироф этди ва уни компания сайтидаги тегишли рўйхатга киритди. Бу ҳақда “MacRumors” хабар берди.

Қурилма эскирган гаджетлар рўйхатига киритилганидан сўнг, Apple дўконлари ва ваколатли сервис марказларида унга хизмат кўрсатиш тўхтатилади. Компания маҳсулотни унинг савдоси тўхтатилганидан кейин 7 йил ўтгач эскирган деб эътироф этади.

“MacRumors”нинг қайд этишича, iPhone X Apple фойдаланувчилари орасида афсонавий қурилма сифатида қабул қилинади. У бренднинг OLED экранга эга бўлган биринчи смартфони бўлган. Шунингдек, қурилмада жисмоний Home тугмаси олиб ташланган ва шу орқали дисплей олд панелнинг деярли бутун қисмини эгаллаган.

iPhone X’да пўлат рамка ва шиша орқа панель ҳам қўлланган. “MacRumors”нинг маълум қилишича, Apple iPhone X’дан ташқари 2018 йилда ишлаб чиқарилган 15 дюймли MacBook Pro ноутбукини ҳам эскирган қурилмалар рўйхатига киритган.

Эслатиб ўтамиз, аввалроқ Apple компанияси 110 та давлатдаги айрим фойдаланувчиларни қурилмаларига жосуслик дастурлари орқали ҳужум қилинган бўлиши мумкинлигидан огоҳлантирганди.