Apple 2017 йилдан бери илк бор iPhone нархини оширади – ОАВ

north_east

Apple iPhone’нинг 20 йиллигига шиша смартфон чиқаради

Жорий йилнинг сентябрь ойида чиқадиган iPhone 17 Pro ва 17 Pro Max’нинг бошланғич нархи 50 долларга ошиши мумкин. Бу ҳақда Jefferies инвестиция банки таҳлилчиларининг прогнозига таяниб, “Macworld” нашри хабар берди.

Мутахассисларнинг фикрича, нарх ошиши ишлаб чиқариш харажатлари ва АҚШ Президенти Дональд Трамп томонидан жорий қилинган бож тарифларини қоплаш зарурати билан боғлиқ. Ҳозирда Apple Хитойда ишлаб чиқарилган смартфонлар учун 20 фоиз бож тўлайди, бироқ Ҳиндистонда тайёрланган қурилмалар Қўшма Штатларга қўшимча тўловларсиз олиб кирилади. Бир қарашда бу вазиятни юмшатиши мумкин, чунки яқинда компания бош директори Тим Кук АҚШ бозорига мўлжалланган iPhone’ларнинг аксарияти аллақачон Ҳиндистондан импорт қилинишини айтган. Аммо АҚШ божхона сиёсати беқарор ва исталган вақтда шартлар ўзгариши мумкин.

Уолл-стрит таҳлилчиларининг ҳисоб-китобига кўра, iPhone 17 нархи iPhone 16’нинг шунга ўхшаш моделлари билан таққослаганда 50-100 доллар қимматроқ бўлиши мумкин. Бу ҳозирча тахмин, бироқ ҳатто нархнинг озгина ошиши ҳам талабга таъсир қилиши мумкин. Apple эса бундай вазиятларни ўз фойдасига буришни билади. Масалан, компания iPhone 17 Pro моделида доимий хотира ҳажмини 128 ГБдан 256 ГБгача ошириши мумкин. Шундай қилиб, нарх расмий равишда кўтарилади, аммо харидор ўша пулга кўпроқ имкониятга эга бўлади.

Ушбу иқтисодий омиллар фонида Apple сунъий интеллект (СИ) соҳасидаги ташаббусларини ҳам фаол ривожлантирмоқда. Тим Кук яқинда таҳлилчилар билан суҳбатда компания “кўпроқ шахсийлаштирилган Siri” ишлаб чиқишда яхши натижага эришганини таъкидлаган. Дастурий таъминот ишлаб чиқиш бўйича катта вице-президент Крейг Федериги эса ички йиғилишда Apple Siri’да дастлаб режалаштирилгандан ҳам “анча катта янгиланиш”ни тақдим этишга тайёр эканини билдирган.

Кук, шунингдек, Apple сунъий интеллект соҳасидаги ишланмаларни тезлаштириши мумкин бўлган битимларига тайёрлигини тасдиқлаган. 

Маълумот учун, ҳозирда Apple’нинг расмий дўконларида iPhone нархлари қуйидагича:

• iPhone 16 Pro ва Pro Max – 999 доллардан бошланади;
• iPhone 16 эса 799 доллардан тақдим этилади;
• iPhone 16e энг арзон варианти – 599 доллар бошланғич нархга эга.

Эслатиб ўтамиз, аввалроқ “Bloomberg” нашри шарҳловчиси Марк Гурман Apple компаниясининг келгуси авлод смартфонлари – iPhone 17 серияси сўнгги беш йил ичидаги энг катта дизайн ўзгаришларига эга бўлишини, шу билан бирга, флагман модели iPhone 17 Pro олд томондан ўз ўтмишдошига жуда ўхшаш тарзда чиқарилишини айтган эди.