Ангрендаги ёнғинда бир киши ҳалок бўлди

Кеча, 7 февраль куни Тошкент вилоятининг Ангрен шаҳридаги кўп қаватли уйнинг бирида ёнғин келиб чиқди. Бу ҳақда Фавқулодда вазиятлар вазирлиги хабар берди. 

Маълум қилинишича, соат 23:19 да Ангрен шаҳридаги Дукент қўрғони “Улуғбек”  МФЙда жойлашган 4 қаватли бинолар бирининг том қисми ёнаётгани тўғрисида Тошкент вилояти ФВББга хабар келиб тушган.

Шунга кўра, қутқарув экипажлари соат 23:30 да воқеа жойига етиб бориб, бинодан барча фуқаролар эвакуация қилинган.

Ёнғин соат 23:57 да қуршаб олиниб, соат 00:50 да тўлиқ бартараф этилган. 

Қўшимча қилинишича, ёнғин оқибатида бир киши ҳалок бўлган. 

Эслатиб ўтамиз, жорий йилнинг 31 январь куни Тошкент шаҳрининг Яшнобод туманидаги “Авиатор” савдо-кўнгилочар марказида ёнғин содир бўлганди ва оқибатда 3 ёшли қизалоқ вафот этганди. Мазкур ҳолат юзасидан Жиноят кодексининг 192-11- (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) ва 259-моддалари (ёнғин хавфсизлиги қоидаларини бузиш) билан жиноят иши қўзғатилган.