Анчелотти “Арсенал”дан учралган мағлубиятнинг асосий сабабларини айтди

Мадриднинг “Реал” клуби бош мураббийи Карло Анчелотти Европа Чемпионлар лигаси (ЕЧЛ) 1/4 финалининг “Арсенал”га қарши биринчи ўйинидаги йирик мағлубиятдан сўнг (0:3) “қаймоқранглилар”нинг жорий мавсумдаги муаммоларига тўхталди.

“Нега жамоа иккинчи бўлимда барқарор натижа кўрсатмаётганини тушунтириш осон эмас. Биз бирлашган, яхши мувофиқлаштирилган ўйинни ташкил эта олмадик. Индивидуал томондан ҳаракат қилдик ва бу бизга тескари таъсир кўрсатди, чунки жамоавийликни йўқотдик. Оқибатда рақиб тўпни ва энг муҳими, ўйиннинг боришини яхшироқ назорат қилди”, дейди мураббий.

Анчелотти нега футболчиларга ғалаба қозониш ҳиссини сингдириш қийин кечаётганига ҳам тўхталди.

“Бу саволга жавоб топиш ҳам қийин. Жамоанинг реакцияси кўп нарсани талаб қилди. Менимча, бу бутун мавсум давомида дуч келган асосий муаммоларимиздан бири. Яхши ва ёмон даврларда компактликни сақлаб қолиш қийин”, дейди Анчелотти.

Жамоалар ўртасидаги жавоб учрашуви 16 апрель куни Испания пойтахтида бўлиб ўтади.