Америкалик машҳур инвестор Ўзбекистон акцияларини сотиб олди 

Узоқ вақтдан буён Сингапурда яшаб келаётган америкалик машҳур инвестор Жим Рожерс ҳозирча Хитой акцияларини сотмасдан ушлаб турганини ва Ўзбекистон компанияларининг акцияларини сотиб олганини маълум қилди. Бу ҳақда у Россиянинг РБК агентлигига берган интервьюсида гапирган.  

Рожерснинг айтишича, у ҳозирги пайтда Россия ва АҚШ акцияларидан фарқли ўлароқ, Хитой активларини сотмаган. Шу билан бирга, инвестор бозорнинг қимматлилигини кўриб, уларни сотишни ҳам истисно қилмаган.  

“Менинг портфелимда кенг доирада Хитой акциялари мавжуд. Лекин такрорлайман, Хитой бозори сўнгги пайтларда деярли тўхтовсиз ўсиб бормоқда, шунинг учун яқинда Хитой акцияларини сотишимга тўғри келиши мумкин, чунки ҳамма нарса ўсмоқда. Ҳозирча аниқ қарор қила олмадим, нима қилишни ўйлаяпман”, деган у. 

2025 йил охирига яқин Рожерс ўз инвестиция портфелига ноодатий позиция қўшгани, яъни Ўзбекистон компанияларининг акцияларини сотиб олганини айтиб ўтган. 

“Мен биржада сотилаётган акцияларнинг кўпчилигини сотиб олдим – уларнинг сони кўп эмас ва мен уларнинг деярли ҳаммасини олганман”, деган инвестор. 

Маълум қилинишича, ҳозир Ўзбекистоннинг “Тошкент” фонд биржасида тахминан 85 компания акциялари муомалада. Бу компаниялар орасида банк, нефть-газ, телекоммуникация ва бошқа секторларга оид акциялар мавжуд. 

Манбага кўра, Рожерснинг портфелида фақат Ўзбекистон эмитентларининг акциялари мавжуд, давлат облигациялари эса йўқ. 

Америкалик инвестор 2021 йилдаёқ “Forbes” нашрига берган интервьюсида Ўзбекистон фонд бозорига қизиқишини айтган, аммо унинг билдиришича, Рожерс ўша пайтда бу юрисдикцияда активларга эгалик қилмаган.

“Ўзбекистон ниҳоят постсовет давридаги янги раҳбар – Шавкат Мирзиёевга эга бўлди. Улар жуда тез суръатларда замонавий иқтисодиётга айланишга ҳаракат қилмоқда. Гарчи, ғарбда ҳануз кенг танилмаган бўлса ҳам, мен Янги Ўзбекистоннинг катта мухлисиман. Илгари мамлакат деярли диктатура тарзида бошқарилган, аммо янги ҳукумат нима қилаётганини билмоқда. Сўнгги бир неча йил ичида эришилган ютуқлар таҳсинга лойиқ”, дея интервью берган у.  

Эслатиб ўтамиз, аввалроқ яқин уч йил ичида Ўзбекистон Америкага қарийб 35 миллиард доллар, келгуси ўн йилда эса 100 миллиард доллардан ортиқ инвестиция киритиши ҳақида хабар берилган эди.