Америкалик чемпион Олимпиадада жиддий жароҳат олди (видео)

Америкалик тоғ чанғиси спортчиси Линдси Вонн 2026 йилда Италияда бўлиб ўтаётган Қишки Олимпиада ўйинларида жиддий йиқилишдан сўнг жарроҳлик амалиётини ўтказди. Бу ҳақда NBC News нашри хабар берди.

Кеча, 8 февраль кунги баҳсларда 41 ёшли спортчи мусобақаларда иштирок этган. Бироқ, пойга бошидаёқ у байроқчага илиниб кетган. Шундан сўнг Вонн ҳавода айланиб, қор устига қаттиқ қулаган ва катта тезликда қиялик бўйлаб сирғалиб кетган. Спортчига воқеа жойида зудлик билан тиббий ёрдам кўрсатилган, кейинчалик эса у шифохонага ётқизилган.

АҚШ терма жамоаси бир неча соатдан сўнг Вонннинг аҳволи барқарор, у америкалик ва италиялик шифокорларнинг ишончли назорати остида эканини маълум қилди.

Манба маҳаллий расмийга таяниб, спортчи чап оёғини синдириб олгани ва жарроҳлик амалиётига муҳтож бўлганини хабар қилди. 

Маълум бўлишича, Олимпиада арафасида ҳам Вонн жароҳат олган эди – у чап тиззасидаги ACL пайларини йиртиб олган. Ушбу жароҳат 30 январь куни Швейцарияда ўтказилган машғулот пайтидаги йиқилиш оқибатида юзага келган. Шунга қарамай, спортчи мусобақаларда махсус брекет билан қатнашган.

Маълумот учун, Линдси Вонн 2010 йил Ванкувер Олимпиадаси чемпиони ҳисобланади. У тоғ чанғиси тарихидаги энг кўп соврин ютган ва энг машҳур спортчилардан бири ҳисобланади.