Актёр Жин Хэкмен ва унинг рафиқаси Бетси Аракаванинг ўлим сабаби аниқланди

Аввалароқ, машҳур америкалик Голливуд актёри Жин Хэкмен ва унинг рафиқаси, пианист Бетси Аракава ўз уйларида ўлик ҳолда топилгани хабар қилинган эди. Маълум бўлишича, улар табиий сабабларга кўра вафот этган. Бу ҳақда Нью-Мексико штатининг Санта-Фе округи расмийларига таяниб, CNN нашри хабар берди.

Округ шерифи Адан Мендосанинг сўзларига кўра, Аракава жорий йилнинг 11 февраль куни ҳали тирик бўлган. Полиция кузатув камераларидан ёзувларни топган ва уларга кўра, ўша куни у дўконга борган ва кейин уйига қайтган. 11 февралдан кейин эса унда ҳеч қандай ҳаёт аломатлари аниқланмаган.

Суд-тиббиёт эксперти Хизер Жареллнинг сўзларига кўра, Аракава ўпкани зарарловчи вирусли ўпка синдромидан вафот этган (бу вирус кемирувчилар орқали юқади). Уйнинг ичкарисида сочилиб ётган дори воситалари шифокор рецепти бўйича буюрилган бўлиб, унинг ўлими билан боғлиқ эмаслиги маълум қилинган.

Экспертнинг таъкидлашича, Хэкмен юрак-қон томир касаллиги оқибатида, шунингдек, альцгеймер касаллиги сабаб вафот этган. Текширув натижасида унинг жасадида ҳеч қандай жиддий ички ва ташқи жароҳатлар аниқланмаган. Жареллнинг тахминича, Хэкмен рафиқасининг бир неча кун олдин вафот этганини билмаган бўлиши мумкин, чунки у жуда оғир аҳволда бўлган. 

Қайд этиш жоиз, Жин Хэкмен ва унинг рафиқаси, пианиначи Бетси Аракава жорий йилнинг 26 февраль куни Санта-Фе шаҳрига яқин ҳудуддаги уйларида ўлик ҳолда топилганди. Полициянинг аниқлашича, Хэкмен, унинг рафиқаси ва уларнинг ити – ҳаммаси турли хоналарда бўлган. 95 ёшли Хэкменнинг жасади ошхона ёнидаги ён хонада, 63 ёшли Аракаваники эса ҳаммомда топилган. Жуфтликнинг немис овчаркаси ҳам ҳаммом шкафи ичида – Аракаванинг ёнида ўлик ҳолда ётгани аниқланган.  

Маълумот учун, Жин Хэкмен – икки карра “Оскар” мукофоти совриндори. У “Француз алоқаси”, “Кечириш йўқ”, “Давлат душмани”, “Пул учун ҳукм”, “Бонни ва Клайд” ҳамда “Миссисипи алангаси” фильмларидаги роллари билан машҳур. Бетси Аракава Хэкменнинг иккинчи рафиқаси бўлиб, улар 1991 йилда турмуш қурган.