АҚШда Трампнинг сурати туширилган янги банкнота чиқиши мумкин

АҚШ Молия вазири Скотт Бессент Президент Дональд Трамп сурати туширилган 250 долларлик янги банкнота тайёрланаётганини тасдиқлади. У буни Оқ уйдаги чиқишида маълум қилди.

Вазирнинг айтишича, қонун ўзгарса, банкнотани муомалага чиқариш масаласини Конгресс ҳал қилади. Ҳозирги АҚШ қонунчилигига кўра, тирик шахсларнинг суратини пулларда акс еттириш тақиқланган. Бироқ ўтган йили амалдаги ва собиқ президентларни валютада тасвирлашга рухсат берувчи қонун лойиҳаси киритилган.

“Ҳозир Вакиллар палатаси ва Сенатда биринчи талабни ўзгартириш бўйича қонун лойиҳаси муҳокама қилинмоқда. Унга кўра, тирик инсон – Дональд Ж. Трамп 250 долларлик купюрада тасвирланиши мумкин. Менимча, АҚШ Президенти, яъни амалдаги Президент суратининг 250 йиллик юбилей банкнотасида бўлишида ҳеч қандай ноўрин жиҳати йўқ”, дейди Бессент Оқ уйда журналистлар билан суҳбатда.

“The Washington Post” нашри хабарига кўра, Трамп томонидан тайинланган ғазначи Брэндон Бич АҚШ Мудра ва гравировка бюросидан янги купюрани тезроқ ишлаб чиқишни талаб қилмоқда. Бу ташаббус АҚШ Мустақиллик декларациясининг 250 йиллиги муносабати билан илгари сурилган.

Эълон қилинган намунавий дизайнда “America 250 anniversary” ёзуви жойлашган. Бу АҚШнинг 1776 йил 4 июлда мустақиллигини эълон қилганига ишора қилади. Нашрнинг ёзишича, сўнгги вақтларда Трамп ўз сиймосини боқийлаштиришга урунмоқда. Унинг портретлари Адлия вазирлиги ва бошқа федерал биноларга осилган, шунингдек, Кеннеди марказига ҳам унинг номи берилган.

Шу билан бирга, Трамп имзоси ҳам АҚШ валютасида пайдо бўлиши мумкин. Март ойида эса Трамп сурати туширилган эсдалик олтин тангасини чиқариш ҳам маъқулланган. Бу қарор танқидчилар томонидан “монархлар ва диктаторлар услуби” дея баҳоланганди.

Эслатиб ўтамиз, аввалроқ АҚШ мустақиллигининг 250 йиллиги муносабати билан мамлакатда амалдаги Президент Дональд Трамп тасвири туширилган паспортлар серияси чиқарилиши эълон қилинган эди.