АҚШда самолёт учиш-қўниш йўлагида одам уриб юборди (видео)

Жорий йилнинг 8 май куни АҚШда йўловчи самолёти учиш-қўниш йўлагида одамни уриб кетиб, унинг ўлимига сабаб бўлди. Бу ҳақда ABC News хабар берди.

Frontier Airlines авиакомпаниясига тегишли самолёт Денвердан Лос-Анжелесга парвоз қилиши керак эди. Ҳодиса 8 май куни кечқурун Денвер халқаро аэропортида содир бўлган.

Нашрнинг хабар беришича, самолёт учиш учун тезланаётган пайтда учиш-қўниш йўлагида бўлган одамни уриб кетган. Зарба оқибатида у воқеа жойида ҳалок бўлган.

Шунингдек, маълум қилинишича, инсон танасининг бир қисми самолёт двигателига тушиб кетган ва шундан кейин қисқа муддатли ёнғин чиққан. Воқеа жойига етиб келган қутқарувчилар ёнғинни тезда ўчиришга муваффақ бўлган.

Airbus A321 русумли самолёт бортида 231 киши – 224 нафар йўловчи ва етти нафар экипаж аъзоси бўлган. Ҳодисадан кейин учувчилар самолётни учиришни бекор қилишга қарор қилган.

Интернетда экипаж ва диспетчерлар ўртасидаги музокаралар ёзуви ҳам тарқалган.

“Диспетчер, Frontier 4345, биз учиш-қўниш йўлагида тўхтаяпмиз. Эм... биз ҳозир кимнидир уриб юбордик... двигателимиз ёнди”, деган учувчи диспетчерга.

Кейинроқ экипаж қўмондони самолёт ичида тутун пайдо бўлганини ва зудлик билан эвакуация зарурлигини маълум қилган.

Йўловчилар учиш-қўниш йўлагидаёқ ҳаво билан тўлдириладиган траплар орқали эвакуация қилинган. Шундан сўнг улар фавқулодда хизмат автобусларида терминалга олиб кетилган.

Дастлабки маълумотларга кўра, бир нафар йўловчи енгил жароҳат олган. Самолётда бўлган барча инсонлар тиббий кўрикка юборилган.

Аэропорт ходимлари эса инсон қандай қилиб учиш-қўниш йўлагига чиқиб қолганини аниқлаш учун аэродром атрофидаги тўсиқларни текширмоқда.

Эслатиб ўтамиз, аввалроқ АҚШнинг Лос-Анжелес шаҳрида кичик самолёт парвоз пайтида электр узатиш тармоғига тегиб кетиши оқибатида қулаб тушганди.