АҚШда кучли бўрон оқибатида қайиқ ағдарилиб, 3 киши ҳалок бўлди

Кеча, 3 июль куни АҚШнинг Висконсин штатидаги Женева кўлида кучли бўрон вақтида қайиқ ағдарилиб кетиши оқибатида уч киши ҳалок бўлди, етти киши қутқариб қолинди. Бу ҳақда “Associated Press” хабар берди.

Маълум қилинишича, ҳодиса Жанубий Висконсин ҳудудидан кучли бўрон ўтиши вақтида содир бўлган. Уолворт округи шерифи ўринбосари Том Ҳауснернинг айтишича, бўрон дарахтларни қулатиб, электр узатиш тармоқлари ва биноларга зарар етказган. Оқибатда округ бўйлаб кўплаб жароҳатланиш ҳолатлари қайд этилган.

Қутқарув хизматларига биноларда қолиб кетган фуқаролар ва бўрон оқибатидаги талафотлар ҳақида кўплаб мурожаатлар келиб тушган. Бироқ йўлларга қулаган дарахтлар ва электр симлари қутқарув ишларини қийинлаштирган.

Лейк Женева шаҳри мэри Тодд Краузе фавқулодда ҳолат эълон қилган. Унинг маълум қилишича, дарахт қулаши оқибатида бир киши енгил тан жароҳати олган, шаҳарнинг бир нечта ҳудудида эса электр таъминоти узилган.

Ҳалок бўлганлар ва қутқарилганларнинг шахси ҳозирча очиқланмаган.

Эслатиб ўтамиз, аввалроқ АҚШнинг Иллинойс ва Индиана штатларига кучли бўрон ва торнадо ёпирилиши оқибатида камида икки киши ҳалок бўлиб, бир неча киши жароҳатланганди.