АҚШда банк офисига қуролли ҳужум уюштирилди. Қурбонлар бор

АҚШнинг Флорида штати Тампа шаҳри чеккасидаги Citibank компаниясига тегишли офис мажмуасида юз берган отишмада икки киши ҳалок бўлди. Яна тўрт киши жароҳатланиб, шифохонага ётқизилди. Бу ҳақда “Associated Press” хабар берди.

Маълум қилинишича, ҳужумчи кеча, 4 ноябрь куни автомобилини офис мажмуасининг ички ҳовлисига ҳайдаб кирган ва милтиқдан ўқ узишни бошлаган. Ўша вақтда очиқ ҳаводаги столларда тушлик қилаётган ходимлар қочишга уринган.

Хилсборо округи шерифи идораси бошлиғи ўринбосари Френк Лосатнинг айтишича, ҳужум вақтида мажмуада 3 200 нафар ходим бўлган. Ҳужумчи бир аёлни отиб ўлдирган. Шундан сўнг ошхонада у билан хавфсизлик хизмати ходими тўқнаш келган. Улар ўртасида отишма юз берган ва қўриқчи ҳужумчини отиб ўлдирган.

“Зўравонлик янада давом этиши мумкинмиди? Албатта. Шу сабабли хавфсизлик хизмати ходимига таҳсин айтиш керак”, деган Лосат матбуот анжуманида.

Ҳозирча ҳужумчи ва ҳалок бўлган аёлнинг шахси ошкор этилмаган. Шунингдек, ҳужум сабаби ва улар бир-бирини танимаган-танимагани ҳам номаълум.

Отишма оқибатида яна тўрт киши ҳаёт учун хавф туғдирмайдиган жароҳатлар билан шифохонага олиб кетилган. Уларнинг ўқдан ёки ҳужумчининг автомобили урилиши оқибатида жароҳатлангани аниқлаштирилмаган.

Ҳодиса жойига биринчи фавқулодда қўнғироқдан кейин бир дақиқа ичида полиция етиб келган. Отишма содир бўлган бино ва унга туташ офисларни текшириш учун 360 нафардан ортиқ ҳуқуқ-тартибот ходими жалб этилган. Текширув ишлари икки ярим соат давом этган.

Яқин атрофдаги Sheraton Tampa Brandon меҳмонхонаси ҳам қочиб келган ходимларга бошпана берган. Меҳмонхона маъмурияти маълумотига кўра, у ерда тахминан 300 нафар Citibank ходими жойлаштирилган. Уларга сув ва овқат берилган, айримларига дам олиш учун меҳмонхона хоналари тақдим этилган.

Citibank компанияси ҳодиса юзасидан ҳуқуқ-тартибот идоралари билан ҳамкорлик қилаётганини билдирган.

Эслатиб ўтамиз, аввалроқ АҚШнинг Техас штати Даллас шаҳридаги Дип Эллум маҳалласида Хэллоуин кечаси учта отишма содир бўлган эди. Оқибатда 4 киши ҳалок бўлиб, 15 нафарга яқин одам жароҳатланган.