АҚШда ҳарбий самолёт ҳалокатга учради

Кеча, 23 октябрь куни АҚШнинг марказий қисмида, Оклахома штатининг Оклахома-Сити шаҳрида АҚШ ҳарбий-ҳаво кучларига тегишли самолёт ҳалокатга учради. Бу ҳақда “Fox 25” телеканали хабар берди.

Оклахома Миллий гвардиясига кўра, АҚШ ҳарбий ҳаво кучларининг OA-1K Skyraider II самолёти Оклахома-Ситининг жануби-шарқий қисмида қулаган. Самолёт ерга урилиши чоғида иккита электр устунига тегиб кетган. Оқибатда электр тармоқлари узилган ва ёнғин содир бўлган, бироқ у тезда ўчирилган.

Маълум қилинишича, бортда фуқаролик пудратчиси ва АҚШ ҳарбий-ҳаво кучлари хизматчиси бўлган. Ҳозирча ҳалок бўлганлар ёки жароҳат олганлар ҳақида маълумот берилмаган. Ҳалокат пайтида экипаж аъзолари ўқув парвози вазифасини бажараётган бўлган. Ҳозирда ҳодиса сабаблари тергов қилинмоқда.

Эслатиб ўтамиз, аввалроқ Венесуэланинг Тачира штатида икки двигателли самолёт Парамилло аэродромидан ҳавога кўтарилиш пайтида қулаб тушган эди. Самолёт ёниб кетгани сабабли экипаж аъзоларининг кимлигини аниқлаш мураккаб бўлиб қолган. Миллий хавфни бошқариш тизимига таянилган ҳолда, бортда камида икки киши бўлгани қайд этилган.