АҚШ ва Эрон келишувга анча яқинлашди – Трамп

Вашингтон ва Теҳрон урушни тўхтатиш бўийча келишувга анча яқинлашиб қолди. Бу ҳақда АҚШ Президенти Дональд Трамп CBS телеканалига берган интервьюсида сўз очди.

“АҚШ ва Эрон музокарачилари икки мамлакат ўртасидаги урушга чек қўядиган битимни якунлашга “анча яқин” туришибди. Трамп шартнома тафсилотларини ошкор қилишдан бош тортди, бироқ “кун сайин ҳамма нарса яхшиланиб бораётганини” айтди”, дейилади хабарда.

Оқ уй раҳбари, шунингдек, якуний келишув Эронга ядровий қуролга эга бўлишга йўл қўймаслигини, акс ҳолда у “бу ҳақда ҳатто гаплашиб ҳам ўтирмаслигини” қайд этган. Унинг сўзларига кўра, натижада бойитилган уран масаласи қониқарли тарзда ҳал этилади.

Трамп “Axios”га берган интервьюсида яхши келишувга эришиш ёки “Эронни кул қилиш” (вайрон қилиш) имкониятлари 50 га 50 эканлигини айтган.

“Financial Times” нашрининг ёзишича, Вашингтон ва Теҳрон оташкесимни 60 кунга узайтириш тўғрисидаги битимни имзолашга яқин турибди. Манбаларнинг сўзларига кўра, ушбу битим Ҳормуз бўғзи фаолиятини босқичма-босқич тиклаш ва Эроннинг юқори даражада бойитилган уран захираларини АҚШга топширишни муҳокама қилиш ҳақидаги келишувни ўз ичига олади. Америкаликлар эса келишув доирасида Эрон портлари блокадасини юмшатишлари, санкцияларни енгиллатишга ҳамда Эрон Ислом Республикасининг хорижда сақланаётган активларини босқичма-босқич музлатишдан чиқаришга рози бўлишлари мумкин.

“The Wall Street Journal” маълумотларига кўра, Трамп Эронга музокараларни давом эттиришни таклиф қилган. Аввалроқ у тинчлик таклифларини рад этиб келаётган эди. Шу билан бирга, томонлар ўртасида оташкесим режими давом этаётгани алоҳида қайд этилган. 

ОАВ хабарларига кўра, томонлар Ҳормуз бўғзида вақти-вақти билан бир-бирларига зарбалар бермоқда. АҚШ армияси Марказий қўмондонлиги ушбу зарбалар америкалик ҳарбийларга қилинган ҳужумлар учун масъул бўлганларга қарши қаратилганини иддао қилмоқда. 

Эслатиб ўтамиз, аввалроқ АҚШ Исроилни Эрон бўйича музокаралардан сиқиб чиқаргани, энди Тель-Авив Вашингтон ва Теҳрон ўртасидаги музокаралар ҳақида маълумотларни Яқин Шарқдаги етакчилар ва дипломатлар орқали йиғишга мажбур бўлаётгани ҳақида хабар берилган эди.